सप्तरी, कात्तिक २ : आज शुक्रबार निर्मम रुपमा एकजना एकल महिलाको हत्या भएको छ ।
जिल्लाको राजविराज नगरपालिका–६ स्थित जिल्ला प्रहरी कार्यालय प्रमुखको निवाससँग जोडिएको घरमा लामो समयदेखि एक्लै बस्दै आएकी ५० वर्षीया आशा देवीको हत्या भएको प्रहरीले जनाएको छ ।
आशा देवीको टाउकोमा इँटा प्रहार गरी हत्या गरेको अनुमान प्रहरीको छ । भुइभरि रक्ताम्य अवस्थामा बिहान उनको शव फेला परेको हो । मृतकको टाउको र दायाँ आँखामा गम्भीर चोट लागेको छ । प्रहरीका अनुसार टाउकोमा छ इन्च लम्बाइ र चार इन्च चौडाइको गहिरो खत रहेको छ ।
रगत लागेको इँटा प्रहरीले बरामद गरेको छ । शव परीक्षणका लागि राजविराजस्थित अञ्चल अस्पतालमा राखिएको प्रहरीले जनाएको छ ।
