बेइजिङ, जेठ ०२ । चीनले शुक्रबार ‘लिजियान’ नामक वाहक रकेटमार्फत पाँच वटा उपग्रह सफलतापूर्वक अन्तरिक्षमा प्रक्षेपण गरेको छ । उक्त रकेट उत्तरपश्चिम चीनको डोङफेङ व्यावसायिक अन्तरिक्ष परीक्षण केन्द्रबाट बेइजिङ समयअनुसार दिउँसो १२:३३ बजे उडाइएको हो ।
चिनियाँ अधिकारीहरूका अनुसार प्रक्षेपण गरिएका सबै उपग्रहहरूलाई निर्धारित कक्षामा सफलतापूर्वक स्थापना गरिएको छ । यो अभियान लिजियान रकेटको १३औँ उडान तथा यस शृङ्खलाअन्तर्गतको १४औँ अन्तरिक्ष मिसन हो ।
हालसम्म लिजियान शृङ्खलामार्फत करिब १०० उपग्रह अन्तरिक्षमा पठाइसकिएको जनाइएको छ । ती उपग्रहहरूको कुल तौल १८ टनभन्दा बढी रहेको बताइएको छ ।
लिजियान चीनद्वारा विकसित ठोस इन्धनमा आधारित वाहक रकेट हो । यसमा छिटो प्रतिक्रिया दिन सक्ने क्षमता रहेको र विभिन्न प्रकारका उपग्रह मिसनअनुसार अनुकूलन गर्न मिल्ने डिजाइन प्रयोग गरिएको कम्पनीले जनाएको छ ।
यसपटक प्रक्षेपण गरिएको ‘तियानयान–२७’ उपग्रहमा अन्तरिक्ष निगरानी क्यामेरा, इन्फ्रारेड क्यामेरा, स्मार्ट डाटा प्रोसेसिङ प्रणाली तथा प्रदर्शन स्क्रिन जडान गरिएको छ ।
उक्त उपग्रहले नयाँ इन्फ्रारेड दूरसंवेदी प्रविधिको परीक्षण गर्नुका साथै अन्तरिक्षबाट तस्बिर संकलन, सेल्फी खिच्ने र बुद्धिमत्तापूर्ण डाटा विश्लेषणसम्बन्धी कार्य गर्ने बताइएको छ ।
चिनियाँ कम्पनीले आगामी दिनमा पुनःप्रयोग गर्न सकिने रकेट प्रविधि, स्वास्थ्य निगरानी प्रणाली तथा मोड्युलर डिजाइनमा थप अनुसन्धान र विकासलाई तीव्रता दिने जनाएको छ ।
