सुन लुट्ने अर्काे ‘गोरे’ समूहका नौं जना पक्राउ

रिपोर्ट नेपाल | 2019 Sep 08 | 04:27 pm 1617

काठमाडौं, भदौं २२ : ३३ किलो सुन तस्करी काण्डमा पक्राउ परेका चुँडामणि उप्रेती ‘गोरे’ कारागारमा रहेका बेला फेरि एउटा सुन लुटेरा ‘गोरे’ समूह प्रहरीको फन्दामा परेको छ ।

प्रहरीले अवैध रुपमा केरुङ नाका हुँदै आउने सुन लुटपाटका साथै विभिन्न अवैध गतिविधिमा संलग्न नौं जनालाई पक्राउ गरेको छ । पक्राउ पर्नेमा ‘गोरे’ भनिने योर्साङ लामा समेत रहेका छन् ।

प्रतिबन्धित विप्लव समूहमा लागेका उनी केही महिनाअघि मात्रै विप्लव समूह त्यागेर लुटपाटको धन्दामा लागेको अनुसन्धानमा देखिएको प्रहरीले जानकारी दिएको छ ।

प्रहरी समक्ष उनले आफू विप्लव समूहमा लागेको तर केही अघि मात्रै सो समूह परित्याग गगरिसकेको बयान दिएका छन् । रसुवा छोदिम्बु गाउँपालिका–४ का घर भई हाल स्वयम्भू बस्दै आएका लामा पक्राउ परेका समूहका नाइके भएको प्रहरीको दाबी छ ।

उनको नेतृत्वमा लुटपाटको घटना हुँदै आएकोमा पछिल्लो दिनमा सुन लुटपाटको योजना बन्दै गरेको सूचनाको आधारमा प्रहरी शनिबार साँझ काठमाडौंको बालाजु माछापोखरीस्थित हाई रेष्टुरेण्ट एण्ड डान्सबारबाट पक्राउ गरेको थियो ।

पक्राउ पर्नेहरु अन्यमा काठमाडौं नुवाकोट तारकेश्वर गाउँपालिका–१ घर भई जगरंखु बस्ने राम बहादुर तामाङ, सोही ठाउँ बस्ने नुवाकोट बिदुर नगरपालिका–७ का पिटर तामाङ, फुटुङ बस्ने गोरखा अजिरकोट गाउँपालिका–४ का कुशल अधिकारी, शेषमति बस्ने नुवाकोट बिदुर नगरपालिका–१० का धर्मराज तामाङ रहेका छन् ।

यसैगरी नेपालटार बस्ने धादिङ खनियाबास गाउँपालिका–५ का बिजय तामाङ, सतुङगल बस्ने गुल्मी ईस्मा गाउँपालिका–५ का युवराज भण्डारी, रसुवा उत्तरगया गाउँपालिका–६ का ३६ वर्षीय छिरिङ तामाङ र माकलबारी बस्ने नुवाकोट तारकेश्वर गाउँपालिका–१ का २८ वर्षीय राजन तामाङ पनि पक्राउ परेका छन् ।

उनीहरुको साथबाट प्रहरीले सानो चाईनिज पेस्तोल २ थान, सोको गोली ४ राउण्ड र नक्कली सुन १ किलो बरामद गरेको छ । उनीहरुलाई महानगरीय प्रहरी परिसर काठमाडौंबाट खटिएको प्रहरीले पक्राउ गरेको हो ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.