सिरहामा एक युवकले आफ्नै श्रीमतीलाई जलाएर हत्या

रिपोर्ट नेपाल | 2020 Jan 26 | 04:11 pm 2268

काठमाडौं, माघ १२: सिरहामा एक युवकले आफ्नै श्रीमतीलाई जलाएर हत्या गरेका छन् ।

जिल्लाका दक्षिणी सीमावर्ती औरही गाउँपालिका ५ की २५ वर्षीया अनितादेवी यादवलाई उनकै श्रीमान विनोद यादवले जलाएको प्रहरीले जानकारी दिएको छ ।

आगोले जलेर गम्भीर अवस्थामा उनलाई उपचारको लागि विराटनगरको एक अस्पतालमा लगिएको थियो । त्यहाँ उपचार सम्भव नभएपछि थप उपचारको लागि काठमाडौं ल्याइएको र लगत्तै कीर्तिपुर अस्पतालले उनलाई मृत घोषणा गरेको थियो ।

हत्या गरेको आरोपमा उनका श्रीमान विनोदलाई प्रहरीले पक्राउ गरेको छ ।

अनितालाई जलाएर मारिएको भन्दै जिल्ला प्रहरी कार्यालयमा परेको मौखिक उजुरीको आधारमा उनलाई पक्राउ गरिएको प्रहरी निरीक्षक दीपेन्द्र श्रेष्ठले जानकारी दिए ।

उजुरीपछि मोरङ प्रहरीको सहयोगमा विराटनगरबाट पति विनोदलाई नियन्त्रणमा लिएर शनिबार सिरहा ल्याइएको छ ।

केही दिन पहिले साउदी अरबबाट घर फर्किएका विनोदलाई भाउजु चौरासीवतीले अनिताको चरित्रको विषयमा कुरा लगाएको प्रारम्भिक अनुसन्धानवाट खुल्न आएको प्रहरीले जनाएको छ ।

मृतककी एक चार वर्षीय छोरा रहेका छन् । उनलाई दरहैयास्थित मावलीमा ल्याएर राखिएको बुझिएको छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.