काठमाडौँ २१ भदौ / भाद्र शुक्ल तृतीयाका दिनमा मनाइने हरितालिका तीज पर्व आज देवाधिदेव महादेवको पूजा आराधना गरी मनाइँदै छ । आज हरितालिका तीजमा पशुपतिमा दर्शनार्थी भीड लागेको छ ।
भाद्र शुक्ल तृतीयामा व्रत बसी शिव पार्वतीको पूजा, उपासना गरेमा पारिवारिक सुख, शान्ति र कल्याणको प्राप्ति हुने धार्मिक विश्वास छ । बिहानैदेखि पूजापाठ गर्न पशुपतिलगायतका मठमन्दिरहरूमा हिन्दु महिलाहरूको भीड लागेको छ ।
आज बिहानैदेखि झमझम पानी परिरहेको छ । पानी परेपछि तीजको रौनक केही कम भए पनि श्रद्धालुहरू छाता ओडेरै पशुपतिनाथमा पुगेका छन् । त्यस्तै पानी नरोकिए पनि उनीहरू नाँचगानमा रमाइरहेका देखिन्छन् ।
पशुपतिनाथका चारवटै ढोका बिहान ३ बजेदेखि नै खुलेका छन् । मन्दिर दर्शनको लागि लामो लामो लाइन लागेको भए पनि बिहानैदेखि चारै ढोका खुलेकोले लाइन चाँडो चाँडो सरेको पशुपति विकास कोषले जानकारी दिएको छ ।
