काठमाडौं, असार १५ । कलाकार प्रकाश सपुतले फेसबुकमा लामो स्टाटस लेख्दै रोमानियामा भएको घटनाले आफूलाई मनमा गहिरो चोट पुगेको र मानसिक रुपमा विक्षिप्त भएको बताएका छन् ।
उनले उक्त घटनाको घट्नाको घोर भत्सर्ना र निन्दा गर्दै कला र कलाकारको सम्मान र सुरक्षाको पक्षमा वकालत गर्नुहुने सम्पुर्ण कलाकर्मी, संगितकर्मी, अधिकारकर्मी, मिडियाकर्मीहरु, राष्ट्रीय लोक तथा दोहोरी गित प्रतिष्ठान लगायतका सम्पुर्ण संघसंस्थाहरुलाई साथै संसार भरी छरिएर रहेका नेपाली शुभेच्छुक, शुचिन्तकहरुप्रति आभार प्रकट गरेका छन् ।
उनले लेखेका छन् “घट्नासँग अरु कुनै खराब नियत र उद्देश्य नजोडिएको भए पनि सार्वजनिक रुपमा भएको यो घट्नाले मेरो मनमा गहिरो चोट पुगेको छ । अहिले मानसिक रुपमा अलि विक्षिप्त भएको छु । भर्खर यात्रा शुरु गरेको छु । यात्रा सजिलो छैन भन्ने त थाहा छ तर यस्तो अनेपक्षित घट्नाहरुले यात्रा अफ्ठ्यारो मात्रै होईन डरलाग्दो पनि हुने रहेछ”
उनले अगाडी लेख्नछन् “बोत्तल प्रहार गर्ने युवाको आचरण र परिस्थिति म राम्रो संग जान्दछु । मैले मेरो जिवनकालमा यस्तो स्वभावका धेरै साथीहरुको संगत गरेको छु । त्यसमाथी सानै उमेरमा ठुलो रकम तिरेर विदेश जानु पर्ने बाध्यताले धेरै नेपालीहरुमा चरम निरासा र मानसिक स्वास्थ्य समस्या देखिन थालेको छ । म विदेश कार्यक्रमहरुमा जादा प्राय सबै ठाउमा यो विषयमा छलफल हुने गरेको पनि छ । यो घट्ना एउटा संयोग मात्रै होईन हाम्रो बाध्यता र परिस्थितिको उपज पनि हो”
कलाकार प्रकाश सपुतमाथि रोमानियामा भएको कन्सर्टमा एक नेपाली युवकले बोतल प्रहार गरेका थिए। पछि ती युवकले खुट्टा ढोगेरै माफी मागेपछि सपुतले माफी दिएका थिए।
