सुत्केरीको मृत्यु भएपछि सेती अञ्चल अस्पतालमा तनाव

धनगढी, चैत ८ :  धनगढीस्थित सेती अञ्चल अस्पतालमा सुत्केरीको मृत्यु भएपछि तनाव भएको छ।  धनगढी उपमहानगरपालिका १२ जुगेडाकी २२ बर्षिया रेखा थापाको उपचारको क्रममा बिहीबार मृत्यु भएपछि अस्पताल पुगेका आफन्तहरुले नारावाजी गर्दै प्रदर्शन गरेका हुन् ।

चैत ३ गते सुत्केरीका लागि अस्पताल ल्याइएकी २२ वर्षीया थापाले ४ गते अप्रेसन गरेर छोरालाई जन्म दिएकी थिइन्। शिशुलाई भने अस्पतालमामै राखिएको छ। शिशुको अवस्था सामान्य रहेको अस्पतालले जनाएको छ।

सुत्केरी भएपछि थापाको पेट सुन्निदै गएको थियो। चिकित्सकलाई पेट सुन्निएको खबर गर्दा पनि उपचारका लागि वास्ता नगरेको गुनासो मृतकका श्रीमान जय थापाको छ।३ दिनसम्म सेती अस्पतालमै राखेर उपचार गरिरहेका आफन्तलाई ७ गते सेती अस्पतालका चिकित्सकले उपचार गर्न नसक्ने भन्दै रिफर गरिदिएको उनले जानकारी दिए।