डोटी, माघ १९ : जिल्लाको दिपायल सिलगढी नगरपालिका–८ स्थित लडागडाको टिमुरदह गाउँनजिकै सामुदायिक वनमा मरेको अवस्थामा एक चितुवा फेला परेको छ ।
मृत चितुवालाई मुचुल्का तयार गरी सिलगढी ल्याउनका लागि डिभिजन वन अधिकृत रामविचारी ठाकुर, रेञ्जर सुरेश रोकाया, सिलगढी सव–डिभिजन वन कार्यालयका सहायक वन अधिकृत भोजराज शर्मा र लडागडा प्रहरी चौकीको टोली सो ठाउँमा पुगेका छन् ।
चितुवाको शरीरमा घाउ चोट देखिएकाले गोली लागेर मरेको वा बँदेलको आक्रमणबाट मरेको हुनसक्ने उक्त टोलीले अनुमान गरेका छन् । चितुवा अन्दाजी तीन वर्षको रहेको छ ।
चितुवालाई सदरमुकाम ल्याई परीक्षण गरेर मात्रै चितुवा मरेको कारण यकिन गर्न सकिने सिलगढी सव–डिभिजन वन कार्यालयका सहायक वन अधिकृत शर्माले बताए ।
सामुदायिक वन क्षेत्रको खोल्सामा चितुवा मृत अवस्थामा भेटिएपछि सामुदायिक वनका अध्यक्ष झङ्कर साउदले डिभिजन वन कार्यालय र सिलगढी सव–डिभिजन वन कार्यालयलाई जानकारी गराएका थिए । उक्त चितुवाको परीक्षण पश्चात आवश्यक प्रक्रियाबाट डिभिजन वन कार्यालयको परिसरभित्रै नष्ट गरिने बुझिएको छ ।
