काठमाडौं, कात्तिक २२: मलेसियाको जोहर मोआर एरिया कुन्दन उल्लुस्थित जिलियन क्रेसियन कम्पनीमा कार्यरत एक नेपाली ड्युटीमा जानका लागि तयार भएको बेला अचानक बेहोस भएर मृत्यु भएको छ ।
मृत्यु हुनेमा सप्तरीको तिरुहुत गाउँपालिका–३ पिप्रराहीटोलका ३२ वर्षीय प्रमोद भिनवार यादव रहेको उनका जेठान सुरेन्द्रकुमार यादवले जानकारी दिए ।
उनको अचानक बेहोस भएर मृत्यु भएको भनिए पनि के कारणले कसरी मृत्यु भयो भन्नेबारे यकिन हुन नसकेको यादवको पारिवारिक स्रोतले जनाए ।
यादवका परिवारले मृतकको शव नेपाल ल्याइदिनका लागि नेपाल सरकार, मलेसियास्थित नेपाली दूतावास तथा सम्बन्धित विभिन्न निकायलाई आग्रह गरेका छन् । दुई वर्षअगाडि यादव रोजगारीको सिलसिलामा मलेसिया गएका थिए ।