लमजुङ, असाेज १४ः नातामा भाउजूपर्ने महिलाको हत्या गरेको अभियोगमा प्रहरीले एक जनालाई पक्राउ गरेको छ । पक्राउ पर्नेमा गिलुङका ५७ वर्षीय बिलबहादुर विक रहेका छन् ।
उनले क्होलासोंथर गाउँपालिका–९ गिलुङकी ५९ वर्षीया बुद्धिमाया विकको हत्या गरेको आरोपमा हत्या भएको २३ दिनपछि उनका देवर नाता पर्नेलाई पक्राउ गरिएको प्रहरी प्रमुख डीएसपी गंगाबहादुर थापाले बताए ।
बिलबहादुरसँगको सोधपुछमा भदौ २० गते राति करिब ९ बजे भाउजू बुद्धिमायालाई टाउकोमा दाउरा प्रहार गरी हत्या गरेको स्वीकार गरेका थिए ।
प्रहरीका अनुसार जग्गासम्बन्धी विवादमा एकल महिला बुद्धिमायालाई बिलबहादुरले हत्या गरेको प्रारम्भिक अनुसन्धानबाट खुलेको छ । बिलबहादुरलाई सोमबार जिल्ला अदालतबाट २० दिनको म्याद थप गरेर थप अनुसन्धान थालिएको लमजुङ प्रहरीले जनाएको छ ।