सिरहा, माघ २७: जिल्लाको नरहा गाउँपालिका–५ स्थित पानबारी चोकमा सोमबार यात्रुबाहक बसको ठक्करबाट मोटरसाइकलमा सवार दुईजनाको मृत्यु भएको छ ।
मृत्यु हुनेमा सिरहा नगरपालिका–३ निवासी ४५ वर्षीय शैलेन्द्र मण्डल र २९ वर्षीय अमन मण्डल रहेको जिल्ला प्रहरी कार्यालय सिरहाले जानकारी दिएको छ ।
सिरहाबाट धरान जाँदै गरेको ना ४ ख ९२४१ नम्बरको यात्रुबाहक बसले सदरमुकाम सिरहातर्फ आउँदै गरेको लु १६ प ४४४१ नम्बरको मोटरसाइकललाई ठक्कर दिँदा मोटरसाइकलमा सवार उनीहरुको मृत्यु भएको बताइएको हो ।
प्रहरीका अनुसार उनीहरु जन्तीबाट घर फर्किदै गरेको अवस्थामा दुर्घटनामा परी गम्भीर घाइते भएका थिए । दुवैलाई उपचारको लागि अस्पताल लैजाँदै गर्दा बाटोमा मृत्यु भएको प्रहरीको भनाइ छ ।
