नुवाकोट, १० : विदुर नगरपालिकाका विभिन्न स्थानमा सञ्चालन भइरहेका सिसिटिभी क्यामरा केही वर्षदेखि बन्द भएकामा आज सोमबारदेखि पुनः सञ्चालनमा आएका छन् ।
नगरपालिका विशेष गरी त्रिशूली बजार, कोलनी, विदुर, बट्टार, सङ्गमचोक, गँगटेलगायत मुख्य चोकमा २० क्यामरा जडान गरिएका छन् । यी चोक बढी प्राथमिकतामा रहेको प्रहरी प्रमुख वसन्तबहादुर कुँवरले जानकारी दिए । कुनै पनि घटनाको निगरानी तथा अनुसन्धानका लागि बजारका सडक र चोकमा क्यामरा राखिएको बताए ।
२०७२ फागुनदेखि सिसी टिभी क्यामरा सञ्चालनमा ल्याइएको र केही समयदेखि क्यामरामा समस्या भएकाले सञ्चालन हुन सकेका थिएन ।
कुँवरका अनुसार अहिले २४ वटा क्यामराहरुमध्ये चार वटा बनाउँदै गरेका र २० वटा आजदेखि सञ्चालनमा आएको बताए । सम्पूर्ण घटनाहरुको निगरानी गर्न प्रहरी प्रशासनले चोकचोक र विभिन्न स्थानमा ड्युटी गरिरहेका जानकारी दिए ।
