फ्लोरिडा, भदौ ११: अमेरिकाको फ्लोरिडामा बन्दुधकारीले अन्धाधुन्ध गोली चलाउँदा दुई जनाको ज्यान गएको छ । ११ जना घाइते भएका छन् ।
फ्लोरिडास्थित ज्याकसोनभिल्लाको मनोरञ्जन कम्प्लेक्समा भिडियो गेम चलिरहेका बेला गोली चलेको हो । ज्याकसोनभिल्ला फ्लोरिडाको ठूलो किनमेल, मनोरञ्जन तथा डाइनिङ कम्प्लेक्स हो ।
गोली हान्ने व्यक्ति डेभिड काट्ज नामका २४ वर्षीय युवक भएको खुलेको छ । बीबीसीका अनुसार बाल्टिमोरका उनले गोलाबारीपछि आफैंलाई गोली हानेर आत्महत्या गरेका छन्।
गेममा हार व्यहोरेपछि युवकले गोली चलाएको खबर स्थानीय सञ्चारमाध्यमहरुले प्रकाशमा ल्याए पनि प्रहरीले भने इन्कार गरेको छ । यसबारे अनुसन्धान भइरहेकाले अहिले नै त्यसको कारण ठोकुवा गर्न नसकिने प्रहरी भनाइ छ ।
घटनामा उनीबाहेक अरुको संलग्नता नरहेको बताइएको छ । प्रहरीका अनुसार, डेभिडले एक मात्रै हाते बन्दुकको साहरामा अन्धाधुन्ध गोली प्रहार गरेका थिए ।
पछिल्ला वर्षहरुमा फ्लोरिडामा अत्यधिक मास सुटिङका घटना हुँदै आएका छन् । सन् २०१६ मा ओर्लान्डोको पल्स नाइट क्लबमा भएको गोलाबारीमा ४९ जनाको ज्यान गएको थियो।
गत फेब्रुअरीमा मात्रै पार्कल्यान्डको दी म्याजेरी स्टोनम्यान गुडल्स स्कुलमा चलेको गोलीमा १७ जनाको मृत्यु भएको थियो ।
