प्रदेश ७ को नाम सुदूरपश्चिम राख्न सिफारिस

| 2018 Sep 25 | 05:46 pm 1935

धनगढी, असोज ९ : प्रदेश ७ को नाम ‘सुदूरपश्चिम’  र राजधानी कैलालीको ‘गोदावरी’ लाई प्रस्ताव गरेको छ ।  नाम र राजधानी तोक्न गठित विशेष समितिले नाम सुदूरपश्चिम राख्ने सिफारिससहित प्रतिवेदन प्रदेशसभा बैठकमा पेश गरेको हो ।

यसअघिको सुदूरपश्चिमाञ्चल विकास क्षेत्रमा रहेका जिल्लाहरु नै हाल प्रदेश ७ मा रहेका छन् । प्रदेशसभा ७ ले प्रदेशको नाम र राजधानी तोक्न नेकपाका सांसद तारा तामाङ लामाको अध्यक्षतामा ५ सदस्यीय समिति गठन गरेको थियो ।

कैलाली जिल्लाको गोदावरी नगरपालिका–४ हाल सेनाको तेघरी ब्यारेकभन्दा उत्तरपश्चिम, धनगढी–डडेल्धुरा सडकदेखि पश्चिममा रहेको सार्वजनिक जग्गामा राजधानी प्रस्ताव गरिएको छ । प्रस्ताव गरिएको स्थान जंगल क्षेत्र भएपनि हाल त्यहाँ बुट्यानमात्र छन् । प्रस्तावित स्थान धनगढीदेखि २० किलोमिटरको दुरी तथा अत्तरियादेखि करिब ४ किलोमिटर अगाडी चुरेको फेदीमा पर्दछ । गोदावरीमाथि पहाडी भु–भाग सुरु हुन्छ ।

सुझाव संकलनका क्रममा नामांकनका सम्बन्धमा थुप्रै रायहरु आएका भएपनि अधिकांशले ‘सुदूरपश्चिम’ नै उपयूक्त हुने सुझाव दिएका आधारमा उक्त नाम प्रस्ताव गरिएको समितिका संयोजक तारा लामा तामाङले बताए । समितिसमक्ष खप्तड, कञ्चन, अपी, महाकाली, अपिसैपाललगायतका नामहरु सुझाव संकलनका क्रममा आएका उनले बताए ।
यसअघि क्षेत्रीय सदरमुकाम रहेको दिपायलमा रहेका कार्यालयहरु क्षेत्रीय स्तरकै कार्यालयको प्रयोजनमा ल्याउने तथा त्यहाँबाट नसार्न समितिले सिफारिस गरेको छ । प्रस्तावित राजधानीमा भौतिक पूर्वाधार तयार नहुँदासम्म हाल रहेको अस्थायी राजधानी धनगढीबाटै कार्य सञ्चालन गर्ने प्रस्ताव गरिएको छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.