काठमाडौं, चैत्र ६ : नक्कली नोटको कारोबार गर्ने दुई जनालाई प्रहरीले पक्राउ गरेको छ। पक्राउ पर्नेमा म्याग्दी बखरबोटका ५२ वर्षीय भीमबहादुर मल्ल र ओखलढुंगा दियालो घर भई हाल भक्तपुर बस्ने मानबहादुर सुवेदी रहेका छन् ।
काठमाडौँको बागबजार क्षेत्रमा नक्कली नोटलाई सक्कली भनेर ठगी गर्दै आएका प्रहरीले बताए । विशेष सूचनाको आधारमा महानगरीय प्रहरी परिसरको कार्यालयबाट खटिएको टोलीले खोजतलास गर्ने क्रममा बागबजारस्थित एक होटलबाट उनीहरूलाई नियन्त्रणमा लिएको प्रहरीले जानकारी दिए ।
उनीहरुले एक हजार रुपैयाँ दरका सक्कली नोटलाई रसायन प्रयोग गरी नक्कली नोट बनाएर ठगी गर्ने गरेको प्रहरीले जनाएको छ। मल्ल र सुवेदीका साथबाट १२ बण्डल नक्कली नोटजस्तो देखिने कागजको बण्डल सात बट्टा, विभिन्न रसायन, नोट बनाउन प्रयोग गर्ने कैँची बरामद गरिएको छ। घटनाबारे अनुसन्धान भइरहेको परिसरका प्रवक्ता होविन्द्र बोगटीले जानकारी दिए।
