दुग्धजन्य पदार्थ ढुवानी गर्ने सवारी साधनमा प्रतीक चिह्न प्रयोग गर्ने

| 2021 Apr 20 | 11:43 am 4169

काठमाडौँ, वैशाख ७ः कृषि तथा पशुपन्छी विकास मन्त्रालयअन्तर्गतको राष्ट्रिय दुग्ध विकास बोर्डले दूध तथा दुग्धजन्य पदार्थ ढुवानी गर्ने सवारी साधनमा प्रतीक चिह्न (लोगो) प्रयोग गर्नेसम्बन्धी कार्यविधि, २०७७ लागू गरेको छ ।

कृषि मन्त्रालयले दूध तथा दुग्धजन्य पदार्थ ढुवानी गर्ने सवारी साधनमा प्रतीक चिह्न (लोगो) प्रयोग गर्ने निर्णय गरेपछि प्रधानमन्त्री केपी शर्मा ओलीले सो लागोको फागुन १२ गते अनावरण गरेका थियए । बोर्डले कार्यविधि लागू गरेपछि लोगो प्रयोगमा आउने भएको बोर्डका कार्यकारी निर्देशक डा. राजेन्द्र यादवले जानकारी दिए ।

दूध तथा दुग्धजन्य पदार्थको ढुवानी आवश्यक सेवाअन्तर्गत रहेको हुनाले दूध तथा दुग्धजन्य उत्पादनको गुणस्तर कायम राखी उपभोक्ताले प्रयोग गर्न सक्ने अवधि बढाउन, दूध तथा दुग्धजन्य पदार्थ ढुवानीमा प्रयोग हुने सवारी साधनलाई पहिचान खुल्ने गरी देशको जुनसुकै स्थानमा बिनाअवरोध निर्वाध रूपमा सञ्चालनमा सहजीकरण गर्नका लागि लोगो प्रयोगमा ल्याएको उनले बताए ।

दूध तथा दुग्ध पदार्थ ढुवानीमा प्रयोग हुने सवारी साधनमा प्रतीक चिन्ह प्रयोग गर्न इच्छुक प्रयोगकर्ताले सवारी साधनको विवरण, प्रयोग हुने क्षेत्र, प्रयोग अवधिसमेत खुलाई पाँच सय रुपियाँ दस्तुरसहित बोर्डसमक्ष निवेदन दिनुपर्ने हुन्छ ।

बोर्डमा पेस गरिएको सो निवेदन समितिमा पेस गर्नुपर्ने हुन्छ । दूध तथा दुग्धजन्य पदार्थ ढुवानी हुने सवारी साधनमा प्रतीक चिन्ह (लोगो)को प्रयोग व्यवस्थापन तथा अनुगमन नियमनका लागि बोर्डका कार्यकारी निर्देशकको संयोजकत्वमा आठ सदस्यीय अनुगमन, व्यवस्थापन तथा नियमन समिति हुन्छ । सो समितिले निवेदनमाथि छानबिन गरी प्रतीक चिन्ह (लोगो) प्रदान गर्न मिल्ने वा नमिल्ने विषय बोर्डमा जानकारी गराउनुपर्ने कार्यविधिमा उल्लेख छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.