अष्ट्रेलिया, साउन ६ : अनशनरत प्रा.डा. गोविन्द केसीको समर्थनमा पश्चिम अष्ट्रेलियाको पर्थमा ऐक्यबद्धतास्वरूप प्रदर्शन गरिएको छ । अनशनको आज २३ औं दिन पुग्दा पनि केसीका मागलाई सरकारले सम्बोधन गर्न नसकेको भन्दै तत्काल माग पुरा गर्न यहाँ रहेको नेपालीले प्रदर्शन गरेका हुन् ।
आइतबार पश्चिम अष्ट्रेलियाको पर्थमा ऐक्यबद्धता कार्यक्रम गर्दै उनीहरुले सरकारबाट भइरहेको हस्तक्षेप समेत तत्काल बन्द गर्न र डा. केसीको माग पूरा गर्न आग्रह गरेका छन् । उनीहरूले डा. केसीका माग समग्र नेपाल र नेपालीहरुको हितमा रहेको भन्दै एेक्यबद्धता जनाएका हुन् ।
यस्तै, सिड्नी र ब्रिसबनमा रहेका नेपालीहरुले डा. केसीको माग जायज रहेको भन्दै उनको समर्थनमा प्रदर्शन गरेका छन् । यहाँ रहेका नेपाली युवाहरुले स्वतःस्फूर्त रुपमा आयोजना गरेको कार्यक्रमबाट विदेशमा पनि नेपालीहरु डा. केसीको पक्षमा रहेको सन्देश दिन खोजेका हुन् ।
