बागलुङ, कात्तिक ९: जिल्लाको तमानखोला गाउँपालिकामा गए राति जीप दुर्घटना हुँदा दुई जनाको मृत्यु भएको छ ।
तमानदेखि वडा नम्बर १ बोङगादोभान बजारतर्फ आउँदै गरेको ध १ ज ७०५ नम्बरको पिकअप जीप राति दुर्घटना हुँदा दुईजनाको मृत्यु भएको जिल्ला प्रहरी कार्यालयले बागलुङले जानकारी दिए ।
मृत्यु हुनेमा तमानखोला–१ निवासी चालक झकबहादुर विक र सोही स्थानका सह–चालक ओमबहादुर गोतामेको घटनास्थलमानै मृत्यु भएको जिल्ला प्रहरी कार्यालयका प्रहरी उपरीक्षक नवराज भट्टले जनाए ।
जीप सडकदेखि करीब एक हजार २ सय मिटर तल खसेको बोङ्गादोभान प्रहरी चौकीले बताए । यात्रु पुर्याएर फर्कदै गरेको जीप घुम्तीमा साँघुरो सडक भएको हुँदा दुर्घटना भएको हुनसक्ने प्रहरीले अनुमान गरेको छ ।
रातको समयमा दुर्घटना हुँदा उद्धारमा निकै समस्या भएको प्रहरीले बताए । शव रातिनै परीक्षणका लागि ढोरपाटन नगरपालिका–१ बुर्तिवाङ स्वास्थ्य केन्द्रमा ल्याइएको भट्टले जानकारी दिए ।
