जापानका प्रधानमन्त्री सिन्जो अबे उनको सत्तारुढ दलको अध्यक्षमा पुनः निर्वाचित भएका छन् । अबेको राजनीतिक दल ‘लिबरल डेमोक्र्याटिक पार्टी’को आज बिहीबार सम्पन्न निर्वाचनमा उनी अध्यक्ष निर्वाचित भएका हुन् ।
यस विजयसँगै प्रधानमन्त्री अबे जापानमा लामो समयसम्म प्रधानमन्त्रीको पदमा रहने निश्चित भएको छ । जापानी प्रधानमन्त्री अबे ६३ वर्षका छन् ।
उनले आफ्नो दलका सदस्य र सांसदबाट ५५३ मत प्राप्त गरेका बताइएको छ । उनको विरुद्धमा उम्मेदवार बनेका अर्का नेता सिगेरु इसाबाले भने २५४ मत मात्र प्राप्त गरेका थिए । नेता इसाबा जापानका पूर्व रक्षामन्त्री हुन् ।
जापानी प्रधानमन्त्री अबे संविधान संशोधनको मुख्य एजेण्डाका साथ प्रधानमन्त्रीमा निर्वाचित भएका हुन् । उनी पुनः आफ्नो पार्टीको प्रमुखमा निर्वाचत भएसँगै सविधान संशोधनको उनको सपना पूरा हुने देखिएको बताइएको छ ।
