बारा, जेठ २७: भारत तथा नेपालका विभिन्न स्थानबाट मोटरसाईकलहरु चोरी गरी विक्री गर्ने एक समुहलाई प्रहरीले पक्राउ गरेको छ ।
पक्राउ पर्नेमा सिम्रौनगढ नगरपालिका वडा नम्बर ८ का १९ वर्षीय श्याम सुन्दर यादव, १८ वर्षीय गुलसन प्रसाद यादव, बारागढी गाउँपालिका वडा नम्बर २ मलाही टोलका २० वर्षीय सुरेश मुखिया बिन, १८ वर्षीय धर्मेन्द्र मुखिया बिन र १९ वर्षीय नन्दकिशोर सहनी रहेका छन् ।
मोटरसाईकल चोरी गर्ने गिरोह सक्रिय रहेको भन्ने सुचनाको आधारमा जिल्ला प्रहरी कार्यालय बारा र ईलाका प्रहरी कार्यालय बारागढीबाट खटिएको संयुक्त प्रहरी टोलीले उनीहरुलाई पक्राउ गरेको प्रहरीले जनाएकाे छ ।
रातको समयमा बारा बारागढी गाउँपालिका वडा नम्बर २ दौरवा मठ अगाडी सडकमा चोरीको अन टेस्ट अपाची मोटरसाईकल थान–१ र बिआर ०५ आर ७५३८ नम्बरको सुपर स्प्लेण्डर मोटरसाईकल थान–१ गरी जम्मा–२ थान मोटरसाईकल सहित समुहका पाँच जनालाई पक्राउ गरेको हो ।
उनीहरुलाई चोरी मुद्दामा बारा जिल्ला अदालतबाट ५ दिनको म्याद थप गरी अनुसन्धान भइरहेको प्रहरीले जानकारी दिए ।
