काठमाडौं, भदौं १५: निजि क्षेत्रको कम्पनी सुन्दर यातायात प्रालिले भदौ २३ गतेबाट विद्युतीय बस संचालन गर्ने भएको छ । कम्पनीका अध्यक्ष भेषबहादुर थापाका अनुसार विद्युतीय बसको कार्यवाहक प्रधानमन्त्री तथा रक्षामन्त्री इश्वर पोख्रेलले एक विशेष समारोहकाबीच उद्घाटन गर्ने कार्यक्रम रहेको छ ।
बसलाई संचालन गर्नका लागि नेपालमै पहिलो पटक निजि कम्पनीले चार्जिङ स्टेशनको समेत उद्घाटन गर्ने कार्यक्रम रहेको छ । भदौ १७ गते दिनको १ बजे चावहिलको भत्केको पुल बुलबुलेमा दुईवटा चार्जिङ स्टेशनको विधिवत उद्घाटन गर्ने कार्यक्रम रहेको कम्पनीले जनाएको छ ।
ऊर्जा तथा सिँचाई सचिव दिनेशकुमार घिमिरेबाट उद्घाटन हुने चार्जिङ मेसिनबाट एक पटकमा चारवटा गाडी चार्ज गर्न सकिने सुन्दर यातायातले जनाएको छ । झण्डै डेढ घण्टा चार्ज गरेपछि २ सय ६८ किलो मिटर यात्रा गर्न सकिने यातायातका अध्यक्ष भेषबहादुर थापाले जनाएका छन् ।
प्रदूषणबाट आतंकित उपत्यकालाई राहत दिनका लागि निजि क्षेत्रको सुन्दर यातायात कम्पनीले विद्युतीय बसको सुरुवात गरेर प्रशंसनीय काम गरेको छ ।