गुल्मी, वैशाख २४: जिल्ला प्रशासन कार्यलय गुल्मीले जिल्लाका विभिन्न दुर्गमा ठाउँहरुमा पुगि घुम्ती सेवा मार्फत नागरिकता वितरण गरेको छ ।
प्रशासनले जिल्लाको कालिगण्डकी, चन्द्रकोट र मदाने गाउँपालिकामा घुम्ती शिविर संचालन गरी एक हजार तीन सय ७८ जनालाई नागरिकता वितरण गरेको जिल्ला प्रशासन कार्यलय गुल्मीका प्रशासकीय अधिकृत लक्ष्मण पाण्डेले जानकारी दिए ।
पाण्डेका अनुसार कालिगण्डकी गाउँपालिकामा गत फागुन महिनाको २२ र २३ गते गरि ५ सय ३५, चन्द्रकोट गाउँपालिकामा चैत ७ र ८ गते तीन सय ३३ र मदाने गाउँपालिकामा वैशाख १२ र १३ गरी पाँच सय १० नागरिकता वितरण गरे ।
गाउँबाट जिल्ला सदरमुकाम आँउदा नागरिकहरुलाई धेरै समस्या हुने र आउन जानमै धेरै रकम खर्च हुने लगायतका समस्याहरु हुने भएकाले स्थानीय स्तरमा नै गएर नागरिकता वितरण गरिएको प्रशासन कार्यलयका नायब सुब्बा तुल्सी न्यौपानेले जानकारी दिए ।
न्यौपानेका अनुसार अझै जिल्ला देखि विकट ठानिएको मालिका गाउँपालिकामा पनि घुम्ती शिविर संचालन गर्ने तयारीमा रहेको बताए । न्यौपानेले यसरी गाउँमै गएर सेवा दिदा स्थानीय नागरिकहरुको समय, पैसा र झन्झट कम हुने दाबी गरे ।
