गुण्डागर्दीमा संलग्न दुई युवक ठमेलबाट पक्राउ

रिपोर्ट नेपाल | 2020 Jan 09 | 04:07 pm 1522

काठमाडौं, पुस २४ः गुण्डागर्दीमा संलग्न रहेका दुई युवकलाई प्रहरीले पक्राउ गरेको छ । पक्राउ पर्नेमा बाग्लुङ ढोरपाटन नगरपालिका ६ घर भई हाल काठमाडौं महानगरपालिका ग्रीनल्याण्ड बस्ने ३१ वर्षीय देवेन्द्र कुमार घर्ती मगर र घादिङ निलकण्ठ नगरपालिका ५ घर भई हाल काठमाडौं नयाँबजार बस्ने २४ वर्षीय सुजन पौडेल रहेका छन् ।

उनीहरुले काठमाडौंका विभिन्न स्थानमा हातहतियार देखाउने तथा धाकधम्की समेत दिई त्रास पैदा गर्ने जस्ता कार्य गरेको भन्ने गोप्य सूचनाको आधारमा पक्राउ गरेको हो ।

महाशाखाबाट खटिएको प्रहरीको टोलीले उनीहरुलाई खोजतलास गर्दै जाँदा बुधबार राति करिब नौ बजेको समयमा काठमाडौंको ठमेलबाट पक्राउ गरेको प्रहरीले जानकारी दिएको छ । पक्राउ परेका दुबै जनाको अनुसन्धान भई रहेको छ ।

अनुसन्धानबाट २०६४ सालमा रमेश बाहुन, कमल राना, छिरिङ, शेर्पा, अनिल लामा, बुद्ध गुरुङ र देवेन्द्र कुमार घर्ती मगर भई बरुण लामा र आशिष गुरुङ समेतलाई गोली हानी घाइते बानाई ज्यान मार्ने उद्योगमा ४ वर्ष जेल सजाय भोगेको खुल्न आएको छ ।

त्यसैगरी २०७१ सालमा सुजन पौडेल लगायत गोविन्द घिमिरे, बिनोद श्रेष्ठ, कमल गुरुङ, अमृत अधिकारी मिलेर राधेको केटा भन्ने काजी शाक्यलाई खुकुरी हानी घाइते बनाएकोमा २०७३ सालमा ज्यान मार्ने उद्योगमा धादिङमा ७ महिना र नुवाकोटमा ४ महिना सजाय भोगिसकेको बुझिएको छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.