काठमाडौं, चैत्र २८ : छुट्टाछुट्टै गरी दुई स्थानमा करेन्ट र आगोमा जली दुई बालिकाको मृत्यु भएको छ । बारा महागढिमाई नगरपालिका–२ भैसियाटोलका १० वर्षीया पुष्पाञ्जली कुमारी यादवको करेन्ट लागेर मृत्यु भएको छ ।
कलमा पानी खाने क्रममा कलमा जोडेको मोटरबाट करेन्ट लाग्दा गम्भीर घाइते भएकी उनको जिल्ला अस्पताल कलैयामा उपचारको क्रममा मृत्यु भएको प्रहरीले जानकारी दिए ।
त्यस्तै आगलागीमा जलेर सुर्खेत लेकबेसी नगरपालिका–२ का ४ वर्षीया सिर्जना टमटाको आगलागीमा परी मृत्यु भएको छ।
अगेनामा आगो फुक्ने क्रममा शरीरमा आगो सल्कन गई गम्भीर घाइते भएकी उनको नेपालगञ्ज भेरी अञ्चल अस्पतालमा उपचारको क्रममा मृत्यु भएको प्रहरीले बताए।
