उपत्यकाको सवारी आवागमन थप सहज बनाउन समिति गठन

रिपोर्ट नेपाल | 2020 Feb 16 | 09:28 pm 3072

काठमाडठौं, फागुन ४: उपत्यकाको ट्राफिक व्यबस्थापनका लागि ट्राफिक प्रहरी महाशाखाले चालेका अभियान एवं कार्यक्रमहरुले सडक अनुशासनमा थप सुधार भएको र आम सडक प्रयोगकर्ताहरुको सवारी आवागमनमा सहजता थपिएको छ ।

महाशाखाले संचालन गरेका ३ महिने ट्राफिक उज्यालो अभियान, पैदलयात्री सुरक्षा विशेष कार्यक्रम, यात्रुमैत्री अभियान, बिशिष्टिकृत सचेतना कार्यक्रम, स्वंयमसेवक परिचालन साथै ट्राफिक लाईटको व्यवस्था, सिसिटिभी निगरानीमा तिव्रता समेतका कारणले ट्राफिक व्यबस्थापनमा सुधार हुँदै गएको छ ।

हाल भईरहेको सुधारलाई अझ प्रभावकारी वनाउन स्थलगत रूपमा अपरेसनल सुधार गर्नु पनि आवश्यक देखिएकोले विशेष गरेर रिङ्गरोडभित्रका बढी प्रेसर हुने स्थान र चोकहरूमा स्थलगत अध्ययन गरू सुझाव पेश गर्न यस महाशाखाका प्रहरी उपरीक्षक जिवन कुमार श्रेष्ठको संयोजकत्वमा प्रहरी निरीक्षक दामोदर सिलवाल र ट्राफिक प्रहरीमा लामो समय कार्यरत रही अबकास भएका प्रहरी निरीक्षक सिताराम हाछेथु गरी ३ सदस्य ट्राफिक सुधार सुझाव समिति गठन गरिएको छ ।

यस समितिले बढी प्रेसर हुने विभिन्न स्थानहरूको स्थलगत अध्ययन गरी कुन कुन ठाँउमा राइट टर्न, यु टर्न र क्रसिङ निषेध गर्ने, कुन सडकलाई वन वे कायम गर्ने, ट्राफिक कोन राखी जाम हटाउने, अब्यबस्थित पार्किङ्गहरु हटाउने, पिक एण्ड ड्रपलाई पुनराबलोकन गरी व्यबस्थापन गर्ने लगायतका अप्रेसन सुधारका बिबिध बिषयमा स्थलगत अध्ययन र सम्बन्धित सरोकारवाला निकायहरुसँग समन्वय गरेर सुझाब पेश गर्ने प्रहरी बरिष्ठ उपरीक्षक ढकालले बताए ।

यसका साथै महाशाखाले प्रधानमन्त्री कार्यालयका सहसचिवज्यूको संयोजकत्वमा गठित कार्यदलले समेत ट्राफिक व्यबस्थापन सुधार सम्बन्धि अल्पकालीन कार्ययोजना बमोजिमका कार्यहरुलाई पनि बिशेष प्राथमिकताका साथ कार्यान्वयन गरिरहेको छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.