अब शिक्षक सेवा आयोगको परीक्षा फारम अनलाइनबाट

रिपोर्ट नेपाल | 2019 Feb 10 | 07:54 am 1657

काठमाडौं, माघ २७ : शिक्षक सेवा आयोगले अबदेखि शिक्षकको स्थायी परीक्षाको आवेदन फारम अनलाइनमार्फत भर्नुपर्ने व्यवस्था गर्ने भएको छ । परीक्षामा आवेदकले फाराम भर्दा समस्या बेहोर्नुपरेपछि आयोगले अनलाइनमार्फत फारम भर्ने व्यवस्था गर्न लागेको हो ।

आयोगका प्रमुख प्रशासकीय अधिकृत डा. तुलसी थपलियाले शिक्षाका कार्यालयमै आएर फारम भर्दा बढी झन्झट र समस्या आउन थालेपछि अनलाइन प्रणालीको सुरुआत गर्न लागिएको जानकारी दिए। आयोगले ट्रायलका रुपमा अब आउने परीक्षामा यो व्यवस्था गर्न लागेको हो । स्थायी शिक्षकको आवेदनसँगै शिक्षण अनुमतिपत्रको परीक्षाको समेत अनलाइन फाराम भर्ने व्यवस्था गर्न लागेको हो ।

आयोगलाई टेक्नोललोजीबाट नजिक बनाउन यस्तो व्यवस्था गर्न लागेको जनाएको छ । आयोगले अबदेखि विषयगत रुपमा शिक्षण अनुमतिपत्रको परीक्षा लिने, पाठ्यक्रम सुधार, अन्य विशिष्टीकरण, प्रश्नको स्तरीकरण र अप्टिकल मार्क रिडर मेसिन (ओएआर) मार्फत वस्तुगत उत्तरपुस्तिका परीक्षण गर्ने लगायतका योजना अघि बढाएको जनाएको छ ।

आयोगका अध्यक्ष ताना शर्माले आयोगलाई प्रविधिमैत्री बनाउन अनलाइनमार्फत आवेदन फाराम भर्ने व्यवस्था गर्न लागिएको जानकारी दिए। यसले गर्दा उम्मेदवारका लागि बढी खर्चिलो र आवेदन फाराम व्यवस्थापन गर्न समस्या हुँदै आएको छ । अनलाइनबाट आवेदन दिन पाउने व्यवस्था भएपछि उम्मेदवारले घरमै बसेर आवेदन दिन सक्ने उनको भनाइ थियो । घरबाट आवेदन फाराम भरे पनि आवेदन दस्तुर बुझाउन तोकिएको बैंकमा जानैपर्ने हुन्छ, अनलाइनमार्फत फारम भर्ने व्यवस्था गरेपछि परीक्षा समेत थप व्यवस्थित हुन सक्ने उनको भनाइ छ ।

त्यस्तै आयोगले स्थायी पदका लागि आवेदन दिएको उम्मेदवारको प्रारम्भिक परीक्षा लिने व्यवस्था गर्न लागेको छ । ‘शिक्षक पदका लागि उम्मेदवारहरुको संख्या धेरै हुन थालेपछि प्रारम्भिक परीक्षाबाट परीक्षार्थी छनोट गरी परीक्षा लिने व्यवस्था गर्न लागेको हो । प्रमुख प्रशासकीय अधिकृत डा. थपलियाले प्रारम्भिक परीक्षाबाट छनोट भएपछि मात्रै स्थायी पदका लागि लिइने लिखित परीक्षामा सहभागी गर्ने व्यवस्था गर्न लागिएको जानकारी दिए।

आयोगले प्राथमिक, निम्न माध्यमिक र माध्यमिक तहमा १२ हजार ७ सय ३९ पदका लागि आवेदन माग गर्दा २ लाख १३ हजार ५५ जनाले आवेदन दिएका थिए । स्थायी पदका लागि लिखित, अन्तर्वार्ता र प्रयोगात्मक परीक्षा लिने कानुनी व्यवस्था भए पनि हालसम्म लिखित र अन्तर्वार्ता मात्र सञ्चालन गरिँदै आएको छ ।

अध्यक्ष शर्माले आयोगको विश्वसनियतालाई थप मजबुत बनाउन नयाँ प्रविधि प्रयोग गर्न लागिएको जानकारी दिए। उनले आयोगलाई एउटा ऐनभित्र मात्रै राख्ने ध्याउन्नमा शिक्षा मन्त्रालय लागेको आरोपसमेत लगाए । उनले भने, ‘तत्कालीन शिक्षामन्त्री गोपालमान श्रेष्ठको कार्यकालयमा आयोगको ऐनको मस्यौदा बुझायांै त्यो कार्यान्वयन हुन सकेन । अहिले त्यो विषयमा मन्त्रालयसँग जानकारी लिन खोज्दा मन्त्रालयका अधिकारीले मौन छन्’ –उनले भने।

उहाँले ७७ हजार दरबन्दी भएको निजामती सेवाका लागि कर्मचारी छनोट गर्न लोकसेवा आयोगको प्रादेशिकस्तरका कार्यालयको समेत व्यवस्था भएकोमा १ लाख ७ हजार दरबन्दी भएको शिक्षक छनोट गर्न एउटा मात्र निकायबाट कठिन हुने तर्क गर्दै आवश्यकता भएकाले हरेक प्रदेशमा शिक्षक सेवा आयोगको पनि कार्यालय रहनुपर्ने बताए।

हाल आयोगमा जम्मा ४० जना कर्मचारी रहेको र तीमध्ये १५ जना कार्यालय सहयोगी तथा चालक कार्यरत छन् । आयोगका सदस्य ज्ञानी यादवले आयोगलाई थप व्यवस्थित बनाउन सातै प्रदेशमा प्रदेश कार्यालय आवश्यक रहेको बताए। थोरै कर्मचारीले भए पनि आयोगले समयमै परीक्षाफल प्रकाशित गर्न सफल भएको बताए।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.