काठमाडौं, कात्तिक १०: अवैध रुपमा जुवा खेलिरहेको अवस्थामा काठमाडौंको महाराजगञ्जबाट २५ जनालाई प्रहरीले पक्राउ गरेको छ ।
उक्त जुवाको खालबाट प्रहरीले झण्डै ३ करोड रुपैयाँ बराबरको रकमसहित उनीहरुलाई पक्राउ गरेको जानकारी दिए ।
गए राति पिपलमार्गमा रहेको विक्रम गौतमको दुई तले घरको भुइँ तल्लामा खेलिरहेका २५ जनालाई दुई करोड ७२ लाख रुपैयाँ नगद, ३ लाख रुपैयाँको चेक, ३२ ओटा कौडा र ४ बुक ताससहित पक्राउ गरिएको प्रहरीले जनाए ।
उनीहरु सबैजनालाई अहिले प्रहरी वृत्त महाराजगन्जमा राखिएको छ र यसबारेमा प्रहरीले अनुसन्धान थालेको जानकारी दिए ।
यस्तै कास्कीमा जुवा खेलिरहेका ९ जना पक्राउ परेका छन् । उनीहरुलाई पोखरा महानगरपालिकाबाट गए राति १० लाख ५८ हजार ५ सय १० रुपैयाँसहित पक्राउ गरिएको प्रहरीले जनाए ।