जनकपुरधाम, बैशाख ६ः जनता समाजवादी पार्टीका संघीय सांसद आफ्नो निर्वाचन क्षेत्र नम्वर २ को शहिदनगर र कमला नगरपालिकामा आईतवार एकैदिन तीन योजनाको शिलान्यास गरेका छन् ।
शहिदनगर नगरपालिका ९ स्थित गोठ कोयलपुरको गढी कुटीमा सांसद अरगरिया र मेयर उदय बरबरियाले संयुक्त रुपमा धर्मशालाको शिलान्यास गरेका हुन् । धर्मशाला निर्माणका लागि सांसद अरगरियाले संसदीय विकास कोषबाट १० लाख रुपैया उपलब्ध गराएका छन् ।
यस्तै सांसद अरगरियाले कमला नगरपालिका ९ स्थित नरहा कब्रस्थानको पर्खाल र सोही वडाको ठेढामा शहिद बमभोला यादव (प्रदिप)को स्मारक निर्माणको शिलान्यास गरेका छन् ।
कब्रस्थानको पर्खाल निर्माणका लागि उनले आफ्नो संसद विकास कोषबाटै ५ लाख र शहिद स्मारक निर्माणका लागि १० लाख रुपैया उपलब्ध गराएका हुन् ।
चार कट्ठा जग्गामा कब्रस्थान रहेको छ । सोको पर्खाल निर्माणमा थप १० लाख रुपैया लाग्ने मुस्लिम अगुवाहरुको आग्रह अनुसार सांसद अरगरियाले आवश्यक पर्ने रकम उपलब्ध गराउने प्रतिवद्धता जनाए ।
यस्तै शहिदनगर नगरपालिका ९ स्थित मस्जिदको मिनार निर्माण गर्न पनि सांसद अरगरियाले ५ लाख रुपैया उपलब्ध गराएका छन् । मस्जिदको निरीक्षण गर्दै उनले निर्माण कार्य अगाडी बढाउन मुस्लिम अगुवाहरुलाई आग्रह गरे । उनले थप रकम आवश्यक पर्दा उपलब्ध गराउने बताए ।
