काठमाडाैं, साउन १७ । सर्वसाधारण व्यक्तिहरूसँग अनावश्यक विवाद गरी डरत्रास, भय सृजना गर्नुका साथै कुटपिट, गैरकानुनी रूपमा रकम माग गर्ने लगायतका अपराधिक गतिविधिमा संलग्न रहेका व्यक्तिहरुलाई प्रहरीले पक्राउ गरेको छ ।
उनीहरुलाई काठमाडाैंको बौद्ध जोरपाटीबाट काठमाडाैं उपत्यका अपराध अनुसन्धान कार्यालयबाट खटिएको प्रहरी टोलिले पक्राउ गरेको हो ।
यसरी पक्राउ पर्नेमा रामेछाप गोकुलगंगा गाउँपालिका वडा नं. ६ घर भई हाल काठमाडाैं गोकर्णेश्वर नगरपालिका वडा नं. ८ जोरपाटी बस्ने बर्ष २८ को बाफ्ले भन्ने विक्की लामा सहित पाँच जना रहेका छन् ।
उनीहरुलाई मुलुकी अपराध संहिता २०७४ को दफा ११८ को अभद्र व्यवहार गर्न नहुने कसूरमा थप अनुसन्धानको लागि प्रहरी वृत्त बौद्ध, काठमाण्डौ पठाईएको प्रहरी उपरीक्षक रविन्द्र रेग्मीले जनाएका छन्।
