गोर्खा फुजेल, पुस ९ः समाजसेवी बसन्त भुजेलले मठमन्दिर धाएर पुजा आजा गर्नु र घरमा महायज्ञ गर्नु भन्दा असहाय अपाङ्गको सेवा गर्नुमा हजार गुणा धर्म हुने बताएका छन् ।
समाजसेवी भुजेलले गोर्खा जिल्लाको गण्डकी गाउँपालिका वडा नं.३ फुजेलमा रहेका ५५ वर्षीय रामबहादुर भुजेल र ४५ वर्षीय चङ्खबहादुर भुजेललाई जाडोको न्यानो कपडा हस्तान्तरण गर्दै उक्त कुरा बताएका हुन् ।
२०७२ सालको भूकम्पले घर भत्किएर गोठमा बस्दै आएका चार जना अपाङ्ग भुजेल परिवारको विचल्ली देखेपछि समाजिक अभियान्ता रेखा तामाङले भुजेल परिवारको घर निर्माणका लागि अभियान चलाएर घर निर्माण भई सकेको छ ।
घर हस्तान्तरण कार्यक्रममा पुगेका समाजसेवी बसन्त भुजेलले भुजेल परिवारको दुर्दशा देखेपछि आफूले केही सहयोग गर्ने बचन दिए बमोजिम बुधबार भुजेल फुजेल पुगेर जिवित रहेको रामबहादुर र चङ्ख भुजेललाई न्यानो कपडाका साथै नगद रकम हस्तान्तरण गरेका छन् ।
समाजसेवी भुजेलले अपाङ्ग रहेका रामबहादुर र चङ्खलाई दुई थान फाइबर सिरक, ज्याकेट, टाउजर, हाइनेक, टोपी, मोजा, जुत्ता, हिटर लगायत नगद हस्तान्तरण गरेका हुन् ।
हस्तान्तरण कार्यक्रममा समाजसेवी भुजेलले देश बिदेशमा बस्ने सहयोगी मनलाई भुजेल जस्ता अपाङ्गलाई सहयोग गर्न आग्रह गरेका थिए ।
समाजसेवी भुजेलले आफू शारिरीक रुपमा अपाङ्ग रहे पनि बौद्धिक रुपमा सही रहेको भन्दै सहयोगका लागि आम नेपालीसँग आग्रह गरेका थिए ।
कार्यक्रममा सामाजिक अभियान्ता रेखा तामाङले आफू भुजेल परिवारको नजिक आउँदा छुट्टै आनन्द आउने गरेको बताइन् । तामाङको सकृयतामा भुजेल दाजुभाइका लागि तीनकोठे भवन निर्माण भएको छ ।
अपाङ्ग भुजेल परिवारलाई तामाङले टिभी, फ्रिज, सोलर बत्तीलगायत विविध सामाग्री जुटाई दिएकी छिन् । न्यानो कपडा हस्तान्तरण कार्यक्रममा बोल्दै भियान्ता तामाङले यो परिवारको हाँसी खुशी देख्दा आफूलाई आनन्द आउने बताइन् ।
