दाङ, पुस ३० : दोस्रो घोराही मेयर कप रनिङ फुटबल प्रतियोगीता २०७५ मा पहिलो उद्घाटन खेल माघ ४ गते हुने भएको छ ।
बिहान ११ बजेदेखि घोराही उपमहानगरपालिकाको कार्यालयबाट सुरु हुने प्रभातफेरि कार्यक्रमसहित खेल उद्घाटन हुने भएको छ।
उद्घाटन खेल माघ ४ गते दिउसो २ बजे भरतपुर खेलमैदानमा संचालन गरिने छ । पहिलो खेल वडा नम्बर १६ र ७ बीच प्रतिस्प्रधा हुने सूचना जारी गरिएको छ । घोराही उपमहानगरका सबै वडाको सहभागीता रहने प्रतियोगीतामा पहिलो हुने वडा फुटबल टीमले एक लाख नगद, रनिङ कप, प्रमाणपत्र र मेडल पाउने छन् ।
यस्तै दोस्रो हुने टीमले ५० हजार नगद, आकर्षक कप, प्रमाण पत्र र मेडल प्राप्त गर्ने घोराही उपमहानगरपालिकाले जनाएको छ । घोराही उपमहानगरले दोस्रो पटक गर्न लागेको प्रतियोगीतामा अनुशासित हुने वडा फुटबल टीमले कप र प्रमाणपत्र प्राप्त गर्ने साथै विभिन्न विद्यामा आकर्षक नगद तथा सम्मान पत्र खेलाडीहरुले प्राप्त गर्ने छन् ।
माघ १४ गतेसम्म हुने प्रतियोगीता चरणमा नकआउट चरणमा प्रतिष्पर्धा गराउने आयोजकले जनाएको छ । कुल १८ वटा प्रतिष्पर्धा मार्फत् बिजेता र उपबिजेता हुने छन् ।
यसैबीच प्रतियोगिता सफल बनाउनका लागि बनेको खेल समितिका संयोजक तथा वडाध्यक्ष भरत अर्यालको संयोकत्वमा खेल तालिका प्रकाशित गरिएको छ । प्रतियोगिता अवलोकन गर्न उपमहानगरले सबैमा आग्रह गरेका छन् ।
