तस्बीर: दिनेशविक्रम शाह
काठमाडौं, जेठ १५ : सर्वोच्चको आदेशमा हत्या अभियोगमा जेल चलान भएका बालकृष्ण ढुंगेललार्इ सरकारले आममाफि दिएपछि नेविसंघले विरोध जनाएको छ । सरकारले गणतन्त्र दिवसको अवसरमा ढुंगेलसहित ८१६ जनालार्इ आममाफि दिएको छ ।
नेविसंघले हत्याजस्तो जघन्य अपराधमा संलग्न ढुंगेललार्इ आममाफि दिएर सरकार नांगिएको आरोप लगाएको छ । द्वन्द्वकालमा ओखलढुंगाका उज्जनकुमार श्रेष्ठको हत्या गरेको अभियोगमा सरकारले उनलार्इ जन्मकैदको सजाय सुनाएको थियो ।
राष्ट्रपति विद्यादेवी भण्डारीले नेपालको संविधानको धारा २७६ बमोजिम कैद सजाय छोट्याउन योग्य र उपयुक्त देखिएका ढुंगेलसमेत ८१६ कैदीको भुक्तान हुन बाँकी कैदको सजाय माफी दिएकी हुन् ।
सर्वोच्च अदालतले ज्यान सम्बन्धी मुद्दामा कैद सजाय भोगिरहेका ढुंगेलको बाँकी कैद मिनाहा सम्बन्धी सरकारी निर्णयको सक्कल फाइल माग गरेको थियो । सोमबार न्यायाधीश मीरा खड्का र टंकबहादुर मोक्तानको इजलासले ढुंगेलको कैद मिनाहासम्बन्धी निर्णयको सक्कल फाइल झिकाउन आदेश दिएको थियो ।
सोमबार सरकारी वकिलले ढुंगेलको कैद मिनाहाको सिफारिस गृह मन्त्रालयसम्म पुगेको जानकारी पाएको बताउँदै के आधारमा माफी दिएको हो आफूले पत्र हेर्न नपाएको बताएका थिए ।
