बर्दिया, असोज ११ः गएराति जिल्लाको गुलरिया नगरपालिका–५ सन्तोषी टोलमा व्यवसायीक रूपमा खाेलिएकाे फर्ममा पसेर बाघले २१ बाख्रा मारेको छ ।
स्थानीय चन्द्रकान्त पौडेलले संचालन गरेकाे फर्ममा आइतबार राति बाघ पसेर ७ खसी, ७ वटा माउ बाख्रा र ६ वटा साना पाठापाठी मारेको हो । मारिएकाे मध्ये ७ वटा खसी दशैंमा बेच्न ठिक्क पारिएको पौडेलको भनाइ छ ।
खोरमा एउटा सानो पाठो जीवित भेटिएको छ भने एउटा बाख्रा हराइरहेको फर्म सञ्चालक पौडेलले बताए । पौडेलले भने ‘बेलुका खोरमा थुनेर गएका २३ मध्ये २१ वटा बाख्रा मृत फेला परेको छ, एउटा बाघले लगेको रहेछ’ । एउटा सानो बच्चो भने खोरबाट तल खसेका कारण जीवितै फेला परेको उनले बताए ।
खोरमा भएकामध्ये एउटा बाख्राको पछाडि भाग खाएको र बाँकी सबैको घाँटीबाट रगत चुसेको पाइएको पौडेलले बताए । वनका कर्मचारीहरुको रोहबरमा मृत बाख्रालाई गाड्न लागिएको उनले बताए ।
