भक्तपुर, चैत २६ः जिल्लाको खरिपाटीस्थित नेपाली सैनिक प्रतिष्ठानमा संचालित अधिकृत क्याडेट तालिम सफलतापूर्वक सम्पन्न गरेका अधिकृत क्याडेटहरुलाई बुधबार एक विशेष समारोहकाबीच प्रधानसेनापति पूर्णचन्द्र थापाले सि.सं.५८ अधिकृत क्याडेट तालिमका १४ जना महिला, १ सय १४ जना पुरुष, ४ जना विदेशी, सि.सं.४८ पदिक/हुद्धा अधिकृत क्याडेट तालिमका १८ जना पदिक/हुद्धा अधिकृत क्याडेट र मित्रराष्ट्र श्रीलंकामा तालिम पुरा गरि स्वदेश फिर्ता भएका सि.सं.५५ का २ जना अधिकृत क्याडेटहरु गरी जम्मा १ सय ५२ जना अधिकृत क्याडेटहरुलाई सहायक सेनानी दर्जाको आयुक्त पद प्रदान गरेका हुन् ।

उक्त अवसरमा प्रधानसेनापति थापाले सि.सं.५८ अधिकृत क्याडेट तालिममा प्रथम हुने अधिकृत क्याडेट सुरेन्द्र बहादुर बोहरा तथा सि.सं.४८ पदिक/हुद्धा अधिकृत क्याडेट तालिममा प्रथम हुने अधिकृत क्याडेट सन्तमान श्रेष्ठलाई Sword of Honour सि.सं.५८ अधिकृत क्याडेट तालिममा महिलातर्फ प्रथम हुने महिला अधिकृत क्याडेट कृपा अधिकारीलाई Cane of Honour र Best in Academic Award प्रदान गरेका थिए ।
साथै उनले मित्रराष्ट्र केन्याबाट सहभागी भएका अधिकृत क्याडेट Kipkirui Rutto Benard लाई The Best International Officer Cadet प्रदान गरेका थिए ।
प्रधानसेनापति थापाले नवआयुक्त अधिकृतहरुलाई सम्माननीय प्रधानमन्त्री के.पी. शर्मा ओलीले पठाएका सम्बोधन वाचन गरेर सुनाएका थिए ।
उक्त सम्बोधनमा प्रधानमन्त्री के.पी. शर्मा ओलीले नवआयुक्त अधिकृतहरुलाई तालिम सफलतापूर्वक सम्पन्न गरेकाेमा हार्दिक बधाई दिदै तालिमको दौरानमा क्याडेटहरुले देखाएका सहनशीलता, कठिन परिश्रम र दृढताको प्रशंसा गरेका थिए ।
सन्देशमा उनले राष्ट्रिय एकता र राष्ट्रिय हितहरुको संरक्षण गर्ने कार्यमा नेपाली सेनाले विगतदेखि नै उल्लेखनीय कार्य गर्दै आईरहेको र नेपाली सेनाले सदैव संवैधानिक सरकारको मातहत र निर्देशनमा आफुलाई व्यवसायीक र मर्यादित संगठनको रुपमा स्थापित गर्दै आएको बताएका थिए ।

उनले आफ्नो विशिष्ट सांगठनिक क्षमताका आधारमा देशभित्र विपद् व्यवस्थापन, राष्ट्र निर्माणका कार्यहरु, नागरिक सैनिक सम्बन्ध बिस्तार र राष्ट्रिय संकटमा नेपाली जनतासंग काँधमा काँध मिलाउदै नेपाल र नेपाली जनताप्रति सदा बफादार रही आफ्नो कार्य गर्दै आएको नेपाली सेना विविध राष्ट्रिय तथा अन्तर्राष्ट्रिय जिम्मेवारीहरु पूरा गर्न सक्षम एक बहुआयामिक संगठनको रुपमा विकसित भएको बताएका थिए ।
प्रधानमन्त्री के.पी. शर्मा ओलीले पठाएका उक्त सन्देशमा कोरोना भाईरस (कोभिड-१९) को संक्रमणबाट बच्न हालका दिनमा नेपाली सेनाले खेलेको भूमिकाको स्वागत गर्दै मित्रराष्ट्र चीनबाट नेपालीहरुलाई उद्धार गरी ल्याउन, भक्तपुर खरिपाटी स्थित नेपाल विद्युत प्राधिकरणको तालिम केन्द्रमा उनीहरुलाई क्वारेन्टिन गरी राख्नको लागि बासस्थानको निर्माण गर्न एवम् क्वारेन्टिन अवधिभर उनीहरुको स्वास्थ्य, सरसफाई तथा खानपीनको उचित व्यवस्था गर्न नेपाली सेनाले खेलेको भूमिका प्रशंसायोग्य रहेको उल्लेख गरेका थिए ।
भविष्यमा उत्पन्न हुन सक्ने विविध सुरक्षा खतराहरुको साथै विभिन्न किसिमका महामारीहरुको सामना गर्न नेपाली सेना र आन्तरिक शान्ति सुरक्षासँग सम्बद्ध सुरक्षा निकायहरु समेत सदैव सजग र सतर्क एवम् आपसी समन्वयमा रहन नितान्त जरुरी रहेको समेत उक्त सन्देशमा उल्लेख गरिएको थियो ।
सोही समारोहमा प्रधानसेनापति थापाले नवआयुक्त अधिकृतहरुलाई हार्दिक बधाई तथा शुभकामना दिदै आफू र मातहतका जवानहरुको सुरक्षा सुनिश्चित गर्दै राष्ट्र र राष्ट्रवासीहरुको विश्वास र भरोसा माथी खरो रुपमा उत्रिनेमा पूर्ण विश्वास व्यक्त गरेका थिए ।
हाल विश्वमा महामारीको रुपमा फैलिरहेको कोरोना भाईरस (कोभिड-१९) को संभावित संक्रमणलाई मध्यनजर गरी अत्यावश्यक सिमित व्यक्तिहरुको उपस्थितीमा आवश्यक सुरक्षात्मक उपाय अपनाई उक्त समारोहको आयोजना गरिएको थियो ।