काठमाडौं, २ असार : पेस्तोल र खुकुरी देखाएर हातखुट्टा बाँधी चोरी गर्ने दुई जना पक्राउ परेका छन । प्रहरीले रामेछापको दोरम्बा–३ घर भएका २९ वर्षीय टोकल भनिने रोहितबहादुर थापा र सिन्धुपाल्चोकको मेलम्ची–१ का ४२ वर्षीय अदिप भनिने विनोद उर्फ टोकलबहादुर तामाङलाई पक्राउ गरेको हो ।
उक्त घटनमा संलग्न रहेको भन्दै महानगरीय अपराध अनुसन्धान महाशाखाको टोलीले उनीहरुलाई ललितपुरको भैंसेपाटी र जवालाखेलबाट पक्राउ गरेको जनाएको छ ।
भक्तपुरको सूर्यविनायक–८, गणेश चोकस्थित मनोहर बस्नेतको घरमा डेरा गरी बस्ने रामबहादुर तामाङको कोठामा प्रवेश गरी उनीहरुले पेस्तोल र खुकुरी देखाई बोले कराएमा ज्यान मार्ने धम्की दिई डरत्रास देखाएर चोरी गरेका थिए ।
गत १० माघमा उनीहरुले करिब १६ लाख ७ हजार ९ सय रुपैयाँ बराबरको सामान लुटपाट गरेका थिए । उनीहरुमाथि थप अनुसन्धानका भइरहेको र महानगरीय प्रहरी परिसर, काठमाडौं पठाइएको प्रहरीले जनाएको छ ।
