इटहरी, जेठ २२: प्रदेश १ को पर्यटन प्रवर्द्वन गर्नका लागि धरान उपमहानगरपालिकामा तीन दिवसीय ‘इष्ट टुरिजम मार्ट–२०१८’ यही जेठ २४ देखि शुरु हुने भएको छ ।
नेपाल पर्यटन बोर्डको आयोजना तथा धरान उपमहानगरपालिकाको स्थानीय संयोजनमा काठमाडौँ बाहिर पहिलो पटक प्रदेश १ कै पर्यटकीय सुन्दर शहर धरानमा मार्ट (व्यापार मेला) को आयोजना हुन लागेको सोमबार जानकारी दिएको हो ।
धरान–१० स्थित सैनिक भवन परिसरमा हुने मार्टमा होटल व्यवसायी, ट्राभल एजेन्सीका ५० वटा तथा प्रदेश १ का १४ जिल्लासहित सप्तरी र धनुषाका समेत गरी जम्मा ६१ वटा पर्यटनसँग सम्बन्धित स्टल रहने धरानमा सोमबार गरिएको पत्रकार सम्मेलनमा मार्ट संयोजक तथा पर्यटनकर्मी भवेश श्रेष्ठले जानकारी दिए ।
उनका अनुसार मार्टमा पूर्वका विभिन्न होटल व्यवसायी तथा ट्राभल एजेन्सीका आफ्ना विभिन्न प्याकेजसहित ५० वटा स्टल रहने छन् । त्यस्तै, प्रदेश १ को १४ जिल्लाले आफ्नो जिल्लामा भएको प्राकृतिक, धार्मिक, सांस्कृतिक तथा अन्य विभिन्न पर्यटकीयस्थलको स्टल राखेर प्रचार गर्नेछन् ।
यसैगरी, धनुषाको जनकपुरधाम र सप्तरीको सखडा भगवतीको पनि एक-एक वटा स्टल रहनेछन् । साथै, मार्टमा टुर अपरेटर, होटल व्यवसायी र गन्तव्यका समितिले आ–आफ्नो उत्पादनलाई आकर्षक तरिकाले प्रस्तुत गर्नेछन् ।
साथै, छिमेकी मुलुक भारतका विहार, बंगाल, सिक्किम र भुटानका ७० जना र काठमाडौँ, चीन र बंगलादेशका ३० जना गरी १०० जना पर्यटन व्यवसायीलाई मार्टको अवलोकन गर्न आउनका लागि निमन्त्रणा गरिएको संयोजक श्रेष्ठले बताए । यसबाट उनीहरुलाई प्याकेज किन्नका लागि आकर्षित गराइने समेत उनले बताए ।
यसका लागि भारतको पूर्णिया, कटियार, किशनगञ्ज, सिलीगुडी, गान्तोक र भुटानको जयगाउँ पुगेर मार्टको प्रचार गरिएको समेत उनले जानकारी दिए ।
एक नम्बर प्रदेशका १४ जिल्लाको विभिन्न पर्यटकीय गन्तव्यको एकै थलोमा प्रदर्शनी र त्यसका लागि प्राप्त हुने सेवा सुविधाको बिक्री तथा पर्यटनको क्षेत्रमा यहाँका निजी क्षेत्रले मार्टमा आफ्नो सेवा प्याकेजको आकर्षक ढंगले प्रस्तुति गर्नका लागि मार्टको आयोजना गरिएको मार्टका प्रवक्ता तथा पर्यटन व्यवासायी वासुदेव बरालले बताए ।
कार्यक्रम अवधिभर क्रेता र विक्रेताबीच ‘बि टु बि’ –विजिनेश टु विजिनेश) मिटिङसमेत हुने आयोजकले जनाएका छन् । मार्टमा सहभागी नयाँ काम गरिरहेका पर्यटनकर्मीलाई थप ऊर्जा प्रदान गर्नका लागि विभिन्न पर्यटन अभियन्ताले प्रवचनसमेत दिने कार्यक्रम रहेको प्रवक्ता बरालले बताए ।
उनका अनुसार पर्यटनका अभियन्ता भारतका राजु बसु, बुद्ध एयरका प्रबन्ध निर्देशक वीरेन्द्रबहादुर बस्नेत, पर्यटनविज्ञ राज ज्ञवालीले व्यवसायीलाई उत्प्रेरणा जगाउनका लागि पर्यटनसम्बन्धी प्रवचन दिइनेछ। कार्यक्रमको उद्घाटन प्रदेश १ का मुख्यमन्त्री शेरधन राईले गर्ने कार्यक्रम तय गरिएको छ ।
रासस
