टिपरले स्कुटरलाई ठक्कर दिँदा स्कुटर सवार अस्मिताको मृत्यु, टिपरलाई आगो लगाएर जलाइयो

काठमाडौँ जेठ ३० : जडीबुटीमा टिपरले स्कुटरलाई ठक्कर दिँदा एक महिलाको ज्यान गएको छ । रौतहटको गौर घर भएकी स्कुटर सवार २४ वर्षीया अस्मिता भण्डारीको मृत्यु भएको हो ।

बुधबार बालुवा बोकेर कोटेश्वर तर्फ जाँदै गरेको ना४ख ३५५८ टिपरले बा७०प ९३९९ स्कुटरलाई पछाडिबाट ठक्कर दिएको थियो । टिपरको ठक्करबाट गम्भीर घाइते भएकी भण्डारीको बी एण्ड बी अस्पतालमा मृत्यु भएको हो । उपचारका क्रममा उनको मृत्यु भएको महानगरीय ट्राफिक प्रहरी प्रमुख वसन्तकुमार पन्तले बताए ।

टिपरले स्कुटरलाई ठक्कर दिएपछि उक्त टिपरलार्इ सथानियले जलाएका छन् । टिपरमा लगाइएको आगो नियन्त्रणको लागि घटनास्थलमा २ वटा दमकल पुगेको थियो ।