पोखरा, माघ १२ राष्ट्रिय चिकित्सा शिक्षा विधयेकको विभिन्न पक्षहरुले विरोध गरिरहेका बेलामा नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले यसको विरोध गर्नुमा कुनै तुक नभएको स्पष्ट पारेका छन् ।
संसदबाट चिकित्सा शिक्षा विधेयक विधिसम्मत पारित भएकाले त्यसविरुद्ध आन्दोलनको कुनै औचित्य नभएको नेता नेपालको भनाई छ ।
प्रेस संगठन कास्कीले आयोजना गरेको पत्रकार भेटघाटमा नेता नेपालले कानूनमा चित्त नबुझे छलफल गरी समयक्रममा मिलाउन सकिने भएकाले आन्दोलनको बाटोमा नलाग्न प्रमुख प्रतिपक्ष कांग्रेसलाई आग्रह समेत गरेका छन् ।
नेता नेपालले भने हिजोका कतिपय कानूनमा हामीलाई पनि चित्त बुझेको थिएन, तर हामी आन्दोलनमा गएनौँ, आज देश विकासको काममा जुट्नु पर्ने बेला आन्दोलन गर्न नहुँने बताए ।
वायु सेवा निगमको वाइडबडी जहाज खरिद, ३३ किलो सुन काण्ड, बुढीकगण्डकी जलविद्युत आयोजना, आयल निगमको जग्गा खरिदमा लगायतमा अनियमितता भएको भए छानविन गरी दोषी ठहरिए कारबाही गर्नुपर्ने र गरिने पनि समेत बताए । दोषीलाई जोगाउने पक्षमा नेकपा नरहेको नेता नेपालले स्पष्ट पारेका छन् ।
शुक्रबार संसदबाट पारित चिकित्सा शिक्षा विधेयकले उक्त क्षेत्रमा गुणात्मक सुधार गर्ने एउटा अभियानलाई नेतृत्व गर्ने नेकपा प्रवक्ता नारायणकाजी श्रेष्ठले बताए ।
डा गोविन्द केसीसँग भएको सम्झौता अनुसारनै विधेयक आएको भन्दै सबै कुरा समावेश नभएको केसीको कुरामा संसदको छलफलमा सम्झौताको मुल पक्ष सही भएकाले स्वीकृत भएको उनको भनाई थियो ।
विधेयक स्वीकार गर्ने कुरा संसदको सार्वभौम अधिकार हो उनले भने, विधेयक पारित हुनुमा डा केसी लगायत चिकित्सा क्षेत्र सुधारमा लाग्नेलाई धन्यवाद दिनुपर्छ । यसमा अरु राजनीतिक कुरा जोडिनु नहुँने बताए ।