गाजामा युद्धविरामको लागी नेपालको पनि समर्थन

| 2023 Dec 13 | 01:54 pm 189

काठमाडौं, मंसिर २७ / संयुक्त राष्ट्रसंघको महासभाले युद्धग्रस्त गाजामा तत्काल मानवीय युद्धविरामको माग गरेकोमा त्यसलाई नेपालले पनि समर्थन गरेको छ ।

राष्ट्रसंघको सुरक्षा परिषद्‍मा अमेरिकाले भिटो प्रयोग गर्दै युद्ध विरामको पक्षमा माहोल बन्न नदिए पनि मंगलरबार महासभाको आपतकालीन विशेष सत्रमा युद्धविरामको पक्षमा १ सय ५३ राष्ट्रले मतदान गरेका हुन् । राष्ट्रसंघका १ सय ९३ सदस्य राष्ट्रमध्ये गाजामा युद्धविरामको पक्षमा १ सय ५३, विपक्षमा १० र तटस्थ २३ राष्ट्र बसेका थिए ।

गाजामा तत्काल युद्धविराम गर्नुपर्ने प्रस्तावको पक्षमा नेपालले मतदान गरेको छ । नेपालका दुई ठूला छिमेकी भारत र चीनले पनि प्रस्तावको पक्षमा मतदान गरी गाजामा युद्धविराम गर्नुपर्ने सन्देश दिएका छन् । मंगलबार भएको मतदानमा अमेरिकाले प्रस्तावको विपक्षमा मतदान गरेको थियो ।

राष्ट्रसंघको महासभामा हुने मतदान राजनीतिक रूपमा निकै महत्वपूर्ण मानिन्छ । तर यो बाध्यकारी भने हुँदैन । इजरायलले गाजामा आक्रमण रोकी युद्धविराम गर्न नमानिरहेका बेला राष्ट्रसंघको महासभाले विश्व समुदाय युद्धविराम र शान्तिको पक्षमा रहेको सन्देश दिएको छ ।

राष्ट्रसंघको सुरक्षा परिषद्‍मा गत साता भएको मतदानमा बहुमत सदस्यले युद्धविरामको प्रस्तावको पक्षमा मतादन गरेका थिए । तर अमेरिकाले भिटो प्रयोग गरी त्यसलाई असफल बनाएको थियो । सुरक्षा परिषद्‍मा १५ सदस्य हुन्छन्, जसमध्ये पाँच स्थायी सदस्य हुन्छन् । सुरक्षा परिषद्‍मा अमेरिका, रुस, चीन, बेलायत र फ्रान्स स्थायी सदस्य छन् । स्थायी सदस्यलाई भिटो प्रयोग गर्ने अधिकार हुन्छ ।

मंगलबार महासभामा युद्धविराम प्रस्तावको पक्षमा बहुमत सदस्यले मतदान गरेपछि राष्ट्रसंघका लागि प्यालेस्टाइन राजदूत रियाद मन्सुरले यसलाई ‘ऐतिहासिक’ बताएका छन् ।

इजरायल र हमासको युद्ध तेस्रो महिनामा प्रवेश गरेको छ । यसअवधिमा १८ हजारभन्दा बढी प्यालेस्टाइनी मारिएका छन् । हमासको आक्रमणमा परि १४ सयभन्दा बढी इजरायली मारिएका छन् ।

 

 

“यो प्रस्तावले आह्वान गर्दैन, माग गर्दछ । हामी यो मागलाई इजरायलले पालना नगरेसम्म आराम गर्ने छैनौं,” प्यालेस्टाइनी राजदूत मन्सुरले भनेका छन् ।

अक्टोबर ७ मा प्यालेस्टाइनी विद्रोही समूह हमासले अचानक इजरायलमा आक्रमण गरेपछि इजरायल–हमास युद्ध सुरु भएको थियो । हमासको आक्रमणमा दश नेपाली विद्यार्थीको समेत मृत्यु भएको थियो । एकजना नेपाली विद्यार्थी विपीन जोशीलाई अझै हमासले बन्धक बनाएको छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.