बाँके, असार ५ : बाँके जिल्लाको खजुरामा लुकाइछिपाइ राखेको अवस्थामा सालको ३३ गोलिया काठ बरामद गरिएको छ ।
जिल्ला प्रहरी कार्यालय र संघीय प्रहरी इकाइ कार्यालयले गएराति गरेको संयुक्त छानबिनमा सो काठ बरामद गरेको हो ।
खजुरा गाउँपालिका वडा नं १ वीरपुरमा इन्द्र मल्लको बगैँचामा राखेको भन्ने विशेष सूचनाको आधारमा प्रहरीले खोजी गर्दा ती काठ लुकाइ राखेको अवस्थामा फेला परेको प्रहरीले जनाएको छ ।
बरामद भएको काठ करिब २२० देखि २३० क्युफिटका ३३ थान गोलिया काठ छन् । काठको बरामदी मुचुल्कासहित कारबाहीका लागि प्रहरीले जिल्ला वन कार्यालयलाई जिम्मा लगाइएको छ ।