काठमाडौं- सरकारी कार्यालयमा कार्यरत झन्डै ३२ हजार कर्मचारीले आजबाट सरकारी सेवा छोड्ने भएका छन्। प्रत्येक जिल्लामा रहेका ढेड दर्जनभन्दा बढि सरकारी कार्यालयहरु साउन १ बाट बन्द भएसंगै करार तथा ज्यालादारीमा काम गर्ने कर्मचारीहरुले अवकाश पाएका हुन्।
सरकारी कार्यालयले औपचारिक रूपमा निष्कासनको निर्णय नगरे पनि उनीहरूलाई मंगलबारदेखि कार्यालय नआउन सूचित गरिसकेको छ। सरकारले नयाँ आर्थिक वर्षदेखि करार र ज्यालादारी कर्मचारीको म्याद थप गर्न नसक्ने जनाएपछि देशभरका झन्डै ३२ हजार कर्मचारी प्रभावित भएका हुन्।
करार तथा ज्यालादारीमा काम गर्ने कर्मचारीको संख्या काठमाडौंमा मात्र करिब १३ हजार छ । संघ (केन्द्र) देखि जिल्ला र स्थानीय तहसम्मका कार्यालय खारेज र मर्ज भएपछि फाजिलमा परेका करार र ज्यालादारी कर्मचारीलाई हाजिर गराउन नसकिने जानकारी यसअघि नै दिइसकिएको छ।
करार र ज्यालादारी कर्मचारीको छाता संगठन अखिल नेपाल सरकारी अस्थायी करार तथा ज्यालादारी कर्मचारी श्रमिक संघले हाजिर नगराए आन्दोलन गर्ने घोषणा गरेको छ।
