काठमाडौँ, जेठ १८ः नेपाली सेनाले आइसोलेसन तथा उपचार केन्द्र निर्माण प्रक्रिया सुरु गरेको छ । निर्माणका लागि आह्वान गरिएको बोलपत्रको अहिले मूल्याङ्कन कार्य भइरहेको नेपाली सेनाले जनाएको छ ।
प्रधानमन्त्री केपी शर्मा ओलीको निर्देशन र मन्त्रिपरिषद्को निर्णयअनुसार नेपाली सेनाले नेपाल–भारत सीमाका विभिन्न आठ स्थानमा एक/एक हजार क्षमताको आइसोलेसन तथा उपचार केन्द्र निर्माण गर्न आवश्यक प्रक्रिया अगाडि बढाएको जानकारी सैनिक प्रवक्ता सन्तोषवल्लभ पौडेलले दिए । कोभिड–१९ का सङ्क्रमितको उपचार तथा भारतलगायत तेस्रो मुलुकबाट आएका नागरिक राख्न केन्द्र बनाउन लागिएको हो ।
उनले भने, “निर्माणका लागि कम्पनी छनोट गर्न गरिएको बोलपत्र आह्वानपछि आएका निवेदनहरूको अहिले प्राविधिक मूल्याङ्कन भइरहेको छ । प्राविधिक मूल्याङ्कनपछि आर्थिक मूल्याङ्कन गरिनेछ र उत्कृष्ट भएका कम्पनीसँग निर्माण सम्झौता गरी निर्माण कार्य अगाडि बढ्छ । ” छनोट भएका कम्पनीले नै भवन निर्माणका साथै शय्यालगायतका संरचनासमेत जडान गर्ने उनले बताए। सेनाले जेठ ५ गते एक हप्ताका लागि बोलपत्र आह्वान गरेको थियो भने जेठ १३ गते बोलपत्र खुलाई मूल्याङ्कन प्रक्रिया अगाडि बढाएको छ ।
प्रधानमन्त्री ओलीले राष्ट्रका नाममा सम्बोधन गर्दै भारतबाट भित्रिने नागरिकलाई राख्न तथा उपचार गर्न नेपाल–भारत सीमामा आइसोलेसन तथा उपचार केन्द्र निर्माणका लागि नेपाली सेनालाई निर्देशन दिएका थिए ।
प्रधानमन्त्रीको निर्देशनपछि वैशाख १३ गते बसेको मन्त्रिपरिषद् बैठकले नेपाल–भारत सीमाका विभिन्न आठ स्थानमा आइसोलेसन तथा उपचार केन्द्र निर्माणको जिम्मा सेनालाई दिने निर्णय गरेको थियो ।
त्यसको एक महिनापछि सेनाले निर्माण प्रक्रिया अगाडि बढाएको हो । मन्त्रिपरिषद्ले नेपाल–भारत सीमाको काँकडभिट्टा, विराटनगर, वीरगञ्ज, बेलहिया, जमुनाह, कृष्णनगर, गौरीफन्टा र गड्डाचौकीलाई तोकेको थियो । गाेरखापत्र दैनिकबाट
