दमौली मंसिर १८ : नेपाली कांग्रेसका वरिष्ठ नेता रामचन्द्र पौडेलले आज बिहिबार कांग्रेसका कार्यकर्ताको जुलुस सहित एक कार्यक्रमका बीच तनहुँ ब्यास नगरपालिकाको बुल्दीखोलाको पुल बिहीबार उद्घाटन गरेका छन्। वरिष्ठ नेता पौडेलले कांग्रेसका कार्यकर्ताको ठुलो उपस्थितिमा पुल उद्घाटन गरेका हुन्।
कांग्रेसका कार्यकर्ताको बाक्लो उपस्थितिमा कांग्रेस केन्द्रीय सदस्य गोविन्द भट्टराई , शंकर भण्डारी, प्रदीप पौडेलसहित केन्द्रीय सदस्यहरू उपस्थित थिए। बुधबार पुल उद्घाटन गर्न गएका नेता पौडेललाई प्रहरीले नियन्त्रणमा लिएको थियो । पुल उद्घाटन गर्न जाँदा प्रहरीले निषेधाज्ञा उल्लंघन गरेको आरोपमा पौडेललाई नियन्त्रणमा लिएर तीन घण्टा पछि मात्रै छाडेको थियो।
तालघरे र दुम्सी जोड्ने पुलको कांग्रेस वरिष्ठ नेता पौडेलबाट उद्घाटन गर्ने कार्यक्रम तय भएको थियो । तर पुल उद्घाटन पौडेलबाट हुन नदिन नेकपा नेतृत्वले विरोध गरेको थियो। कार्यक्रममा नेताहरुले पुल उद्घाटन रोकेको भन्दै सरकार र स्थानीय प्रशासनको आलोचना गरेका छन् ।