एपीएफ टोलीद्वारा लाखौंका चोरीपैठारीको सामान बरामद

रिपोर्ट नेपाल | 2020 Jan 30 | 08:58 pm 4242

काठमाडौं, माघ १६: अवैध रुपमा भन्सार छली गरी ल्याएका लाखाैं रूपैयांकाे विभिन्न सामाग्री सशस्त्र प्रहरी बल (एपीएफ)ले बरामद गरेको छ ।

सुनसरी जिल्लाको भोक्राहा नरसिंह गाउँपालिका ६ स्थित ईशराईलबाट बुधबार एपीएफ टोलीले करीव एक लाख ८५ हजार रुपैयाँ बराबरको चोरीपैठारीको किराना सामान बरामद गरेको सशस्त्र प्रहरी बलले जानकारी दिएको छ ।

भारतबाट अवैध रुपमा ल्याउँदै गरेको उक्त सामान सशस्त्र प्रहरी बल नेपाल बोर्डर आउट पोष्ट लौकहीबाट खटिएको टोलीले बरामद गरेको हो ।

टोलीले उक्त सामान ल्याउन प्रयोग भएको को ५ प ९७२ र बीआर ५० एच ५८६६ नम्बरको दुई वटा मोटरसाइकल समेत बरामद गरेको छ ।

एपीएफ टोलीले बरामद गरेको सामान तथा मोटरसाईकल सेतुबन्धु भन्सार कार्यालयमा बुझाएको छ ।

त्यसैगरी सशस्त्र प्रहरी बल नेपाल नम्बर २ गण झापाबाट खटिएको टोलीले बिहीबार करीव एक लाख १७ हजार रुपैयाँ बराबरको चोरीपैठारीको लत्ताकपडा बरामद गरेको छ ।

भारतबाट भन्सार छली गरी नेपालतर्फ ल्याउँदै गरेको उक्त लत्ताकपडा एपीएफ टोलीले झापा जिल्लाको मेचीनगर नगरपालिका १३ स्थित पूर्व पश्चिम लोकमार्गबाट बरामद गरेको हो ।

बरामद लत्ताकपडा भन्सार कार्यालय काँकडभिट्टामा बुझाईएको छ ।

यसैगरी धनुषा जिल्लाको जनकपुर उपमहानगरपालिका १२ स्थित कुवारामपुरबाट बिहीबार कै दिन एपीएफ टोलीले करीव एक लाख एक हजार रुपैयाँ बराबरको चोरीपैठारीको किराना सामान बरामद गरेको छ ।

भारतबाट अवैध रुपमा नेपालतर्फ ल्याउँदै गरेको उक्त सामान सशस्त्र प्रहरी बल नेपाल सुरक्षा वेश जनकपुरबाट खटिएको टोलीले बरामद गरेको हो ।

बरामद सामान टोलीले भन्सार कार्यालय जनकपुरमा बुझाएको छ ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.