गुल्मी, कात्तिक २९: गत कात्तिक १६ गते हत्या गरिएको अवस्थामा फेला परेका तीन जनाको हत्यामा संलग्न रहेको आशंकामा प्रहरीले २ जनालाई पक्राउ गरेको छ ।
चन्द्रकोट गाउँपालिका–३ हर्राचौरमा बेवारिसे अवस्थामा फेला परेका ३ वटा शवको पहिचाहनसँगै हत्यामा संलग्नलाई पक्राउ गरी शुक्रबार प्रहरीले सार्वजनिक गरेको हो ।
पक्राउ पर्नेमा बाग्लुङ गल्कोट नगरपालिका–८ ज्यामिरेका ४६ वर्षय पूर्णबहादुर सुनार र १९ वर्षका माधव सुनार रहेका र अर्का एक अभियुक्त फरार रहेको गुल्मीका प्रहरी उपरीक्षक राजेन्द्रसिंह खड्काले जानकारी दिए ।
हत्या हुनेमा मोरङ कानेपोखरी गाउँपालिका– ३ हरकपुर घर भइ हाल पोखरा महानगरपालिका बस्दै आएकी ३२ वर्षकी सरिता भन्ने शिवमाया लिम्बु र उनका ७ वर्षका जुम्ल्याहा छोरीहरु गंगा र जमुना रहेको प्रहरीले बताए।
जिल्ला प्रहरी कार्यालय गुल्मी र केन्द्रीय अनुसन्धान ब्यूरो (सीआईबी) को टोलीले अभियुक्तलाई पोखरा महानगरपालिका २५ हेम्जास्थित डेराबाट पक्राउ गरेको प्रहरीले जनाए ।
तीनवटै शव पोष्टमार्टमपछि पाल्पा जिल्ला अस्पतालमा राखिएको थियो । तीन जनाको निर्ममतापूर्वक हत्या गरी कच्ची सडकबाट ४ मिटर पर शव फालिएको अवस्थामा भेटिएको थियो । घटनाका विषयमा अनुसन्धान भइरहेको प्रहरीले जनाए ।
