पर्यटकले सप्तरंगी टीका लगाएर मनाए तिहार

रिपोर्ट नेपाल | 2019 Oct 30 | 07:49 am 2320

कास्की, कात्तिक १३: पोखरा भ्रमणमा रहेका पर्यटकले सप्तरंगी टीका लगाएर तिहार मनाएका छन् ।

मंगलबार भाइटीको अवसरमा पश्चिमाञ्चल होटल संघ पोखराले आयोजना गरेको १२ औं भाइटीका महोत्सवमा पर्यटक रमाएका हुन् । महोत्सवमा सहभागी १२ देशका ३० पर्यटकले टीका लगाए । उनीहरुले टीका मात्र लगाएनन् देउसी र भैलोसमेत खेलेर रमाइलो गरे ।

भाइटीका महोत्सवको निरन्तरतासँगै पछिल्ला वर्षका पर्यटक दोहोर्याएरसमेत टीका लगाउन पोखरा आउन थालेका छन् । फ्रान्सकी मिसेल मोजा ८ औं पटक पोखरामा भएको भाइटीका महोत्सवमा सहभागी भएकी छन् । यस वर्ष उनी छोराबुहारी र नातीनातीनासहित तिहार मनाउन नेपाल आएकी हुन् ।

पश्चिमाञ्चल होटल संघको आयोजनामा संस्कृतिक पर्यटनको विकास गर्न भाइटीका महोत्सव हुँदै आएको छ । भाइटीका महोत्सवमा अमेरिका, जर्मनी, फ्रान्स, अष्ट्रेलियालगायतका देशका पर्यटकको सहभागीता रहेको पश्चिमाञ्चल होटल संघका अध्यक्ष विकल तुलाचनले जानकारी दिए ।

महोत्सवमा भाग लिएर नेपाली परम्परा अनुसार तिहारमा टीका लगाउन पाउँदा आफूले निकै नौलो अनुभव गरेको महोत्सवमा सहभागी फ्रान्सका मोजो इमानुअलले बताए ।

महोत्सवमा रेन्वो चिल्ड्रन होमका वालिकाले पर्यटकलाई टीका लगाइदिएका थिए । पर्यटकलाई उनीहरुले नेपाली परम्परा अनुसार टीका लगाएर उपहार दिएका थिए । पर्यटकले पनि बालिकाहरुलाई दक्षिणा दिएका थिए । पर्यटकले देउसी भैलो र सांस्कृतिक कार्यक्रममा भरपुर मनोरञ्जन लिए । सेलरोटी र अन्य परिकारको स्वादमा पनि उनीहरु उत्तिकै रमाए ।

तिहारको सांस्कृतिक पक्षलाई संरक्षण गर्दै यसका माध्यबाट पर्यटक आकर्षित गर्ने अभिप्राय महोत्सवले लिएको आयोजक संघका सचिव गणेश पहारीले जानकारी दिए ।

पोखरामा भाएको भाइटीका महोत्सवमा ८ औं पटक सहभागी भएकी फ्रान्सकी मिसेल मोजो । अन्नपूर्ण पोष्टबाट

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.