जिल्ला स्वास्थ्य कार्यालय मकवानपुरले दिएकाे जानकारी अनुसार अलिहेसम्म हेटौंडा उपमहानगरभित्र ८ जनामा डेंगु र १ जनामा स्क्रपटाइफस फेला परेको जनाएको छ। हेटौंडा बजार क्षेत्रका बिरामीमा विशेष गरी डेंगुको संक्रमण देखिएको स्वास्थ्य कार्यालयले जानकारी दिएकाे हाे ।
हेटौंडा अस्पतालको सिफारिसमा रगत परीक्षणका लागि स्वास्थ्य कार्यालयमा आएका २९ जनामध्ये चार महिला र चार पुरुषमा डेंगु र एक पुरुषमा स्क्रपटाइफस भेटिएको बताए ।
स्वास्थ्य कार्यालयले निःशुल्क रूपमा परीक्षण गर्ने भएका कारण धेरै बिरामी डेंगुको शंका हुनेबित्तिकै त्यहाँ आउने गरेका छन् । तर जिल्ला जनस्वास्थ्य कार्यालयसँग परिक्षण गर्ने किटको अभाव देखिएको छ।
डेंगु परीक्षण गर्ने किट दुई सय माग गरिएकोमा मुस्किलले ५० वटा प्राप्त भएकाले परिक्षणमा समस्या भएको कार्यालयले जनाएको छ । स्वास्थ्य कार्यालयसँग अब २५ वटा मात्र किट बाँकी रहेको जनाइएको छ।
निजी क्लिनिकले डेंगुको परीक्षण गर्दा निकै महँगो शुल्क लिंदै आएका छन् । निजी क्लिनिकले ३ हजार २ सय रुपैयाँसम्म शुल्क लिनेको गरेकाे पाइएकाे छ ।
उक्त क्षेत्रमा डेंगुका बिरामी भेटिएपछि उच्च सर्तकता अपनाउन स्वास्थ्य कार्यालयले जानकारी गराएकाे छ । असार अन्तिम साता र साउनको पहिलो हप्तामा आएको अविरल वर्षासँगै जमेको पानीका कारण डेंगो र स्क्रफटाइफसको फैलिएको हुन सक्ने अनुमान गरिएको छ ।
यसअघि सुनसरीको धरान र झापामा डेंगुले भयावह रुप लिएको थियो । उक्त क्षेत्रमा डेंगु नियन्त्रण गर्न धेरै सकस परेको थियो ।
