काठमाडौं, असार ७: न्युटन हाई स्कुल बालुवाटारमा सम्पन्न हाजिरी जवाफ प्रतियोगितामा माउण्ट समिट बोडिङ्ग स्कुलकी निमा ल्यामु शेर्पाले प्रतियोगिताको उपाधी जितेकी छन् ।
प्रतियोगिता न्युटन हाई स्कुलका पूर्व विद्यार्थीहरुको संगठन (न्युटन अलुमनाई) को आयोजनामा गत जेठ २५ गते सम्पन्न भएको थियो भने शनिबार एक समारोह बीच घोषणा र पुरस्कार वितरण गरिएको हो ।
उक्त हाजिरी जवाफ प्रतियोगितामा प्रथम पुरस्का एक लाख, द्वितीय पुरस्कार पचास हजार र तृतीय पुरस्कार बीस हजार रहेको थियो ।
प्रतियोगिताको प्रथम हुनेमा माउण्ट समिट बोडिङ्ग स्कुलकी निमा ल्यामु शेर्पा, द्वितीय हुनेमा एल आर आइ स्कुलका आविस्कार बिक्रम सिंह र तृतीय हुनेमा लिटिल एन्जल्सका सुमित मोहन यादब पुरस्कृत भएका छन् ।
प्रतियोगितामा उपत्यकाका ६० विद्यालयका ७ सय ५३ जना कक्षा ७,८,९,र १० मा अध्ययनरत विद्यार्थीहरुले सहभागिता जनाएका थिए । प्रतियोगी विद्यार्थीहरुलाई समसामयिक ८ सय प्रश्नहरु पहिले नै अध्ययन गर्न दिएर १ सय वटा प्रश्नहरुमा वस्तुगत उत्तर छनौटको आधारमा लिखित परीक्षा लिइएको थियो ।
पुरस्कार समारोहका प्रमुख अतिथि काठमाडौं महानगरपालिका वडा नम्बर ४ का अध्यक्ष तथा महानगरपालिका शिक्षा संयोजक मोहन बहादुर बिष्टले उत्कृष्ट ५० विद्यार्थीलाई सम्मान पत्र र प्रथम, द्वितीय, र तृतीय हुनेहरुलाई उक्त राशिका चेकहरु हस्तान्तरण गरेका हुन् ।
न्युटन स्कुलले विद्यार्थीलाई पढाउने मात्र काम नगरेर अतिरिक्त क्रियाकलापको माध्यमबाट विद्यार्थीको सर्वागिण विकाशमा जोड दिएको र यौटा उत्कृष्ट विद्यालयको रुपमा स्थापित भै सकेको अध्यक्ष विष्टले बताए ।
समारोहमा प्याब्सन प्रदेश ३ का अध्यक्ष थकिन कुमार गुरुङ, न्युटन हाइ स्कुलका प्रिन्सिपल राम बहादुर केसी, सह प्रिन्सिपल नवीन मरासिनी लगायत प्रतियोगी विद्यार्थीका विद्यालयका प्रिन्सिपलहरुको उल्लेखनीय उपस्थिति थियो । न्युटन अलुमनाईका अध्यक्ष रितेश ठाकुरले यस्तो प्रतियोगिता हरेक बर्ष गरिने जानकारी दिएका छन् ।
