सुर्खेत, असार ६ : कर्णाली नदीमा जीप दुर्घटना भएर बेपत्ता भएकी खार्पुनाथ गाउँपालिकाकी उपाध्यक्षसहित ११ जना बेपत्ताको अझैसम्म अवस्था अज्ञात छ । सुरक्षा निकाय, गोताखोर र स्थानीय परिचालन गरेर खोजी गर्दा पनि कसैलाई भेट्न नसक्दा अहिले सो गाउँमा शोकमा मात्र छैन् थप पीडामा परेको छ ।
खार्पुनाथ गाउँपालिका–५ वेणुसैन र कैलेबालु भन्ने स्थानमा जाँदै गरेको लु १ ज ७१६६ नम्बरको महेन्द्र पिकअप गाडी कर्णाली नदीमा खस्दा गाउँपालिका उपाध्यक्ष सिन्धु हमालसहित ११ जना बेपत्ता भएका थिए । बेपत्ता भएकाहरुको खोजी तीव्र बनाउँदा पनि शव नभेटिएपछि बेपत्ता सबैको शव नभेटिएपछि पुत्ला बनाएर बिहीबार दाहसंस्कार गरिएको छ ।
यसबीच खार्पुनाथ गाउँपालिकाले ११ जनाको मृत्यु भएको शोकमा असार १५ गते शोक बिदा दिने निर्णय गरेको छ । बेपत्ता भएका यात्रुको कुनै पत्ता नलागेपछि गाउँपालिकाको कार्यपालिकाको बैठकले शोकमा बिदा दिने निर्णय गरेको हो ।
कार्यपालिकाको बैठकपछि पालिका अध्यक्ष कर्ण रावल र प्रमुख कार्यकारी अधिकृत चन्द्रविर शाहीले विज्ञिप्त जारी गर्दै असार १५ मा शोक बिदा दिने निर्णय भएको जानकारी दिएका छन् । उक्त विज्ञिप्तमा असार १५ गते पालिकाभित्र रहेका सरकारी, गैरसरकारी कार्यालय र विद्यालय सबै बन्द हुने जनाइएको छ ।
