सरकारले महारानीको शैलीमा सम्बोधन गर्न लगाएर राष्ट्रपतिलाई विवादमा पार्‍यो : देउवा

रिपोर्ट नेपाल | 2019 May 05 | 02:23 pm 1598

काठमाडाैं, वैशाख २२ : प्रमुख प्रतिपक्ष दल कांग्रेसका सभापति शेरबहादुर देउवाले राष्ट्रपति जस्तो सम्मानित संस्थालाई थप विवादमा पारेको आरोप लगाएको छ । आइतबार सरकारले संघीय संसदको संयुक्त बैठकमा पेश गरेको नीति तथा कार्यक्रममाथिको छलफलमा उनले बेलायती महारानीको शैलीमा सम्बोधन गर्न लगाएर सरकारले राष्ट्रपति जस्तो सम्मानित संस्थालाई थप विवादमा पारेको बताएका हुन् ।

सभापति देउवाले ‘मेरो सरकार’ भनि राष्ट्रपति विद्या भण्डारीलाई नीति तथा कार्यक्रम सम्बोधन गर्न लगाएर सरकारले राष्ट्रपति जस्तो सम्मानित संस्थालाई थप विवादमा पारेको बताए । ‘बेलायती महारानीको शैलीमा सम्बोधन गर्न लगाएर सरकारले राष्ट्रपति जस्तो सम्मानित संस्थालाई थप विवादमा पारेको छ’, सभापति देउवाले भने, ‘यो लोकतान्त्रिक गणतन्त्रका लागि शुभ संकेत होइन ।’

देउवाले सरकारको नीति तथा कार्यक्रममा बकम्फूसे र उडन्ते कुरा राखिएको उल्लेख गर्दै त्यो कार्यान्वयन नहुने दाबी गरे । उनले लडहमा सरकारले आफ्नो नीति तथा कार्यक्रम प्रस्तुत गरेकाले त्यसको कार्यान्वयन हुने कुनै आधार नरहेको उनको दाबी थियो । देउवाले आफ्नो पालामा सुरु गरिएको कतिपय कार्यक्रमहरुको जस सरकारले लिन खोजेको भन्दै आपत्ति जनाए । उनले न्यानो स्याटलाईट आफ्नो पालामा सुरु भएको कार्यक्रम भएपनि त्यसलाई सरकारले आफैले अन्तरिक्षमा पठाएजस्तो बकम्फूसे दाबी गरेको भन्दै असन्तुष्टि व्यक्त गरे ।

देउवाले प्रधानमन्त्री केपी ओलीसँग मुलुकमा पूँजी सृजना तथा परिचालन गर्ने कुनै ज्ञाननै नभएको बताए । उनले लगानी कसरी बढाउने ? रोजगारी कसरी वृद्धि गर्ने ? वर्तमान सरकारको नेतृत्वको कुनै पनि ज्ञान, सीप र तागत नभएको बताए । सभापति देउवाले विना योजना ल्याइएको सरकारको नीति तथा कार्यक्रम पूरा नहुने निष्कर्षमा आफ्नो पार्टी पुगेको स्पष्ट पारे ।

फेसबुकबाट तपाईको प्रतिक्रिया

© Copyright Report Nepal Pvt. Ltd. | Website By : GOLDENMUD CREATION PVT. LTD.